सङ्गीत ख्यलय् लोकंह्वाःम्ह वरिष्ठ सरोदवादक सुदर्शन राजोपाध्याययात भारतय् ‘कलाक्षेत्रम’ पुरस्कारपाखें हंगु दु।

राजोपाध्याययात महाराष्ट्रया पुणेय् अखिल लोककला कल्चरल अर्गनाइजेसनं ग्वसाः ग्वःगु भारत उत्सव २०२६ य् सिरपाः लःल्हाःगु खः। अर्गनाइजेसनया महासचिव डा प्रमोद नानवरेया कथं भारत उत्सवय् भारतया थीथी राज्यया स्वद्वः व न्यासः सिबें अप्वः कलाकारपिंसं भारत नाट्यम, कत्थकलिसें लोककला न्ह्यब्वःगु खः। थ्वहे मे १६ निसें २२ तारिखतक जूगु उगु भारत उत्सवय् राजोपाध्याययात निर्णायक जिम्मेवारी कःघायेत ब्वँनातःगु खः।

निर्णायक जुइत पुणे थ्यंकादीम्ह वय्कःयात प्रतिष्ठित कलाक्षेत्रमपाखें हंगु खः। थ्वसिबें न्ह्यः नापं नेपाःया कला व तजिलजियात अन्तरराष्ट्रिय मञ्चतक थ्यंकाः वयाच्वनादीम्ह वय्कःयात भारतया थीथी राज्यय् जूगु ज्याझ्वलय् ‘सुरताल अन्तरराष्ट्रिय सम्मान पुरस्कार २०२५’, ‘विविधता मे एकता राष्ट्रिय सम्मान २०२०’, ‘इन्डियन बेस्टिज अवार्ड–२०१९’, पश्चिम बङ्गाल सरकारपाखें ‘सङ्गीतमंजरी’ उपाधि लिसें नं हने धुंकूगु दु। अथे हे, सन् २०१५ य् गुजरातय् सुरिल साँझया पाखें ‘स्वर्णपत्र’ लःल्हाःगु खः।

नेपाःया सन्दर्भय् वय्कलं रेडियो नेपाल पाखें सन् २००२ लय् जूगु जिल्लाव्यापी सङ्गीत प्रतियोगिताय् न्हाप जुयादीगु खःसा शास्त्र सम्मान २०१८, सेभ दी नेसन अवार्डलिसेंया सिरपाः लिसें सम्मान कयादीगु दु। सरोदवादनबाहेकं वय्कःया नेपाली भाषाय् पलपल, पानीसरी, त्यो रात, नेपाल भाषाय् नसला, हसना, छन्हुनिन्हू, छगू मतिना, शास्त्रीय सङ्गीतपाखे वनडे रागाज, सोलफुल म्युजिक फर मेडिटेसन, भारतपाखें सुरिल म्युजिक इन २०१५ लिसेंया सिडी नापं क्यासेटत प्रकाशित जूगु दु।

Categorized in मनोरन्जन