सरकारं नेपाल नागरिक उड्डयन प्राधिकरण (क्यान)या महानिर्देशकय् सहसचिव मुकेश डङ्गोलयात नियुक्त याःगु दु।

सिंहदरबारय् च्वंगु प्रधानमन्त्री लिसें मन्त्रिपरिषदया ज्याकुथिइ थौं च्वंगु मन्त्रिपरिषदया बैठकं संस्कृति, पर्यटन लिसें नागरिक उड्डयन मन्त्रालयया सहसचिव डङ्गोलयात क्यानया महानिर्देर्शक पदय् नियुक्त यायेगु निर्णय यानागु धकाः सरकारया प्रवक्ता लिसें शिक्षा नापं खेलकुदमन्त्री सस्मित पोखरेलं जानकारी बियादिल।

मन्त्रिपरिषद् बैठकं सहकारीइ जूगु बेथिति जाँचबुझ आयोग, २०८२ या प्रतिवेदन सार्वजनिक यायेगु निर्णय याःगु दु। अथे हे, बैठकं आर्थिक दँ २०८३÷८४ या निंतिं वर्षे वा मांया न्यूनतम समर्थन मूल्य निर्धारण यासें मोटा वा प्रति क्विन्टल स्वद्वः व ६६० तका व मध्यम वा या मू प्रतिक्विन्टल स्वद्वः व ८६० तका क्वः छ्यूगु दु।

मन्त्रिपरिषद् बैठकं नेपाःचीन स्वाइगु विद्युत् प्रसारण लाइन आयोजना (चिलिमे–केरुङ) या कार्यान्वयनया निंतिं चीन सरकारयात छ्वइगु लिसःपौ (प्रतिउत्तर पत्र ‘लेटर अफ रिप्लाइङ’) स्वीकृत यायेगु निर्णय यानागु मन्त्री पोखरेलं धयादिल।

Categorized in राष्ट्रिय