गोरखा मिडिया नेटवर्क प्रा.लि.या छेँ खाली यायेत येँ महानगरपालिकां सुचं सार्वजनिक याःगु दु।महानगरं मंगलवाः ग्यालेक्सी फोर के टेलिभिजन दूगु छेँ खाली यायेत गोरखा मिडिया प्रा.लि.यात झिंन्यान्हुया सुचं जारी याःगु दु।

सुचनाय् ई दुने कानून कथं हलंज्वलं मयंकूसा महानगरपालिका विवाद निरुपण (कार्यविधि) ऐन, २०७५ या दफा ७० कथं लिलाम जुइगु सुचनाय् न्ह्यथनातःगु दु।लिपांगु खुसिया नितिं धासें सार्वजनिक याःगु सुचनाय् धयातःगु दु, ‘निर्णय कार्यान्वयन याःगु खुलाया ई पूवंगुलिं ग्यालेक्सी फोर के टिभिइ दूगु हलंज्वलंत लिलाम याये दयेमा धकाः वादी मृगेन्द्र मिश्रया २०८३ बैशाख २१ गते निवेदन पेस जूगुलिं थ्व सुचं पिथंगु दु।’

२८ साउन २०८२ स उच्च अदालत पाटनपाखें निलाया दुने न्यायिक समितिपाखें जूगु निर्णय कार्यान्वयनया धकाः महानगरपालिका तकंया नामय् परमादेशया आदेश जारी जूगु खः।अदालतया आदेश कथं १४ कार्तिक २०८२ स महानगरपाखें टोली खटेयानाः निर्णय कार्यान्वयन याःगु सुचनाय् धयातःगु दु।

व स्वया न्ह्यः मिश्रं भाडा असुल उपर यानाः छेँ जग्गा खाली याकाब्यु धासें गोरखा मिडियो नेटवर्कया नायः गितेन्द्र बाबु –जीबी) राईया नामय् महानगरपालिकाया न्यायिक समितिइ मुद्दा तःगु खः।जीवी राई नं सहकारी संस्थाया रकम अपचलन यानाः गोरखा मिडिया प्रालिपाखें संचालित ग्यालेक्सी फोर के टेलिभिजनय् लगानी याःगु खः। उकिया खुलसा जुइधुंकाः राई आः फरार जुयाच्वंगु दु।

जीवी राईलिसे जानाः ग्यालेक्सी टेलिभिजनय् ज्या याःम्ह रास्वपा सभापति रवि लामिछानें तकं सहकारी संस्थाया रकम अपलचनया मुद्दा फयाच्वंगु दु।

Categorized in राष्ट्रिय