महानगर पालिका, यूनेस्को व काठमाडौं सिटी अफ फिल्म्सया मंकाः ग्वसालय् नेपाः डान्स एकेडेमी, बौद्ध दर्शन अध्ययन पुचः व नेपा सांस्कृतिक पुचःया सहकार्यय् शनिवाः राष्ट्रिय नाचघर, जमलय् गुरु यज्ञमानपति बज्राचार्य एकल साँझ “चर्या प्रवाह” जुगु दु।

चर्या बौद्ध दर्शन व नृत्य क्षेत्रय् विशिष्ट योगदान बियादीम्ह संस्कृतिविद् चर्या गुरु यज्ञमानपति बज्राचार्ययात हंगु ज्याझ्वलय् थीथी कलाकारपिसं चचा प्याखं न्ह्यब्वयाः गुरुया योगदानप्रति श्रद्धा प्वंकूगु खः। ज्याझ्वलय् नुगःखँ तयादिसें गुरु यज्ञमानपति बज्राचार्यं धयादिल, “थौंया थ्व लकसय् द्यःपिनिगु अलौकिक उपस्थिति महसुस जुयाच्वंगु दु। थुज्वःगु आध्यात्मिक व सांस्कृतिक ज्याझ्वः तसकं म्हो जुइ। थौं जिं थःगु जीवनया सार्थकता धइगु महसुस यानागु दु ।”

वय्कलं येँ महानगरपालिकाप्रति विशेष आभारव्यक्तयासें थःत मनू जुयाः जन्म जूगु अर्थ थौं तसकं गहन रूपय् अनुभूत जूगु दु धयादिल। ग्वसाः खलःपाखें येँ महानगर पालिकाया कार्यवाहक प्रमुख सुनिता डंगोलं गुरु यज्ञमानपति बज्राचार्यं गुगुं जात, दँ, वर्ग वा समुदायया भेदभाव मयासें सकसितं समान रूपय् शिक्षा प्रदान यानावयाच्वंगु धयादीगु दु। वय्कलं नेपाः डान्स एकेडेमीं संस्कृति संर क्षणय् निरन्तर सक्रिय गुरु व्यक्तित्वयात हनेत थुज्वःगु ज्याझ्वः ग्वसाः ग्वःगु धासें सकल कलाकारपिन्त सुभाय् देछानादिल।

ज्याझ्वःया संयोजन नेपाः डान्स एकेडेमीया प्रमुख संयोजक रीना महर्जन, नेपाः डान्स एकेडेमीया नायः रोहिया महर्जन, नेपाः डान्स एकेडेमीया म्यानेजिङ डाइरेक्टर गम्भीर मान सिंहं यानादीगु खःसा ज्याझ्वः सदिक्षा श्रेष्ठं न्ह्याकादीगु खः। “चर्या प्रवाहं” नेपाःया अमूल्य अमूर्त सांस्कृतिक सम्पदाया संरक्षण व प्रवद्र्धनय् महत्वपूर्ण योगदान ब्यूगु ग्वसाःखलःया धापु दु। चचा प्याखं व हुलाप्याखंख्यःया विशिष्ट व्यक्तित्वपिनि ब्वति दुगु ज्याझ्वलय् ज्याझ्वः ताःलाकेत ग्वाहालि यानादीपिन्त मतिनाया चिं लःल्हाःगु खः ।

Categorized in राष्ट्रिय