सिफारिस राष्ट्रिय मानवअधिकार आयोगं रास्वपा सभापति रवि लामिछाने नापं झींन्ह्यम्ह सांसद तयेत २३ व २४ भदौय् जुगु घटनाय् अनुसन्धान यायेत सिफारिस याःगु दु।

सभापति लामिछाने नख्खु कारागारं पिहावयेवं अन च्वपि कैदीत पिहावःगु खनेदुगु किटान यासे उकियागु सूक्ष्म अनुसन्धान यायेत आयोगं सिफारिस याःगु खः। उगु घटनाय् प्रवक्ता मनिष झा व नेता हरि ढकालयात अनुसन्धान यायेत धाःगु दु।रास्वपाया सांसदपि सुधन गुरुङ, दीपक बोहरा, गणेश कार्की, सुलभ खरेल, शिव यादव, बब्लु गुप्ता, कृष्णकुमार कार्की, डा. तोसिमा कार्की, राजीव खत्री, केपी खनाल, आशिका तामाङ, ज्वाला संग्रौला, सोम शर्मा व पुरुषोत्तम यादवयात अनुसन्धान यायेत सिफारिस याःगु दु।

रास्वपा केन्द्रीय सदस्य खेमराज साउद व बाजुरापाखे रास्वपा उम्मेदवार जूम्ह हेमराज थापायात न अनुसन्धान यायेत धाःगु दु। प्रदर्शन याये न्ह्यः, प्रदर्शन जुयाच्वंगु इलय् व उमिसं ब्यूगु अभिव्यक्ति लुमकूगु खः। राष्ट्रिय अनुसन्धानं संकलन याःगु सूचं, सामाजिक सञ्जाल, प्रकाशित समाचार लगायतया आधारय् उपि प्रदर्शन यायेगु दुथ्याःगु दयेफु धासे आयोगं अनुसन्धानया निति सिफारिस याःगु खः।

राष्ट्रिय मानव अधिकार आयोगं भदौ २३ या प्रदर्शनय् जुगु दमन व कन्ह्य कुन्हु जुगु घटनाबारे छानबिन याना प्रतिवेदन थौ सार्वजनिक याःगु खः। आयोगया सदस्य लिली थापाया संयोजकत्वय् भदौ २३ व २४ या घटनाय् मानव अधिकार उल्लंघनया विषय अनुसन्धान यायेत समिति गठन याःगु खः।

Categorized in राष्ट्रिय