चलचित्र विकास बोर्डया सहकार्य व नेवाः फिल्म सोसाइटीया ग्वसालय् नेवाः युवा लक्षित न्यान्हुयंकंया चलचित्र छायाँकन तालिम व कार्यशाला गोष्ठी मंगलवाः क्वचाल।

तालिमया लिपांगु दिं बरिष्ठ भिज्यूअल एडिटर मानिकरत्न तुलाधरं तालिमय् ब्वति काःपिन्त दसिपौ लःल्हानादीगु खः।२०८३ जेठ ८ गतेनिसें १२ गतेतक न्ह्याःगु उगु तालिम व कार्यशाला गोष्ठी येँया २५ वडा केलत्वाः जनबहाः मछिन्द्र क्लबया छेँय् जूगु खः।

नेवाः युवा पुस्ता दथुइ नेपाली चलचित्र क्षेत्रया छायाङ्कन सम्बन्धी प्राविधिक ज्ञान, सिर्जनात्मक दृष्टि व व्यावहारिक सीप विकास यायेगु तातुनाः ग्वसाः ग्वःगु थ्व तालिमं न्हूपिं व सक्रिय संकिपाकःमिपिनिगु नितिं ज्याख्यलय् वइ धकाः ग्वसाः खलकं धाःगु दु।

जेठ ८ गते न्ह्याःगु तालिमया उलेज्या ज्याझ्वलय् बरिष्ठ दृश्य सम्पादक माणिक उराय् व बरिष्ठ निर्देशक प्रकाश सायमि व सोसाइटीया निवर्तमान नायः विराजकाजी राजोपाध्यायपिन्सं थःथःगु नुगःखँ तःगु खः।सोसाइटीया नायः लुःजः सिंहं सोसाइटीं थ्वहे असार दुने चलचित्र क्षेत्रय् संचार क्षमता विकास तालिम, छायाङ्कनया बृहत तालिम, उद्घोषण तालिमम नं यायेगु ग्वसाः दु धकाः धयादिल।

उगु ज्याझ्वलय् सोसाइटीया आजीवन व साधारण सदस्यपिन्त म्हसीका पौ नं लःल्हाःगु खः। अथेहेतुं संस्थाया सल्लाहकार कथं नीर शाह, माणिक उराय् व प्रकाश सायमियात दसिपौ नं देछाःगु खः।उगु तालिम व कार्यशालाय् सिनेमाटोग्राफर दिपक बज्राचार्य, लुःजः सिंह, गौतम श्रेष्ठ व फोटोग्राफर अमरेन्द्र श्रेष्ठलिसेलिसें थीथी प्रतिभावान् व्यक्तित्वपिन्सं प्रशिक्षण बिइगु ज्या जूगु खः।

Categorized in मनोरन्जन