हलिं नेवाः दबूया सहलह मुँज्या
लहनान्युज | चिल्लाथ्व चौथी ११३९ (मार्च १० २०१९)
नेपालय् जुइत्यंगु हलिं नेवाः दबूया स्वक्वःगु तःमुँज्या नितिं खलःपुचः नाप सहलह ज्याझ्वः सनिवाः जूगु दु ।
ज्याझ्वलय् पाहाँ कथं लक्ष्मी दास मानन्धर, हितकर वीर सिं कंसाकार, मल्ल के सुन्दर, प्रेम शान्ति तुलाधर, डा. महेश मान श्रेष्ठ लगायत नेपालभाषा ख्यःया थीथी खलः पुचःत, थीथी राजनीतिक पार्टीया प्रतिनिधि, नेवाः बुद्धिजीविपिं, संचाःख्यःपिनिगु ब्वति दुगु खः ।
शिक्षा, स्वास्थ्य, आर्थिक खँय् नेवाः तय्त राज्यं तसकं हे ल्यूने लाकाः नेवाः तय्गु अस्तित्वहे न्हनावनीगु अवस्थाय् थ्यने धुंकूगुलिं थुगु सम्मेलनं नेपालभाषा व नेवाः जाति ल्यंका तयेगु खःसा हलिंया सकल नेवाः तय्त छधी–छपं यानाः यंके माःगु दु, थुकिया नितिं दक्वं सक्वं पूर्वाग्रह त्वःताः पार्टीगत भावनायात छखेतयाः न्ह्याःवनेमाःगु खँ पाहाँ कंसाकारं कनादिल ।
दबूया नायः शाक्य सुरेनया सभाधक्ष्यताय् जुगु उगु ज्याझ्वलय् सुरेन्द्र भक्त श्रेष्ठं लसकुस यानादीगु खःसा सुदय शिलाकारं न्ह्याकादीगु खः ।
बुखँ–नेवाः सूचना केन्द्र किपा–राजेन्द्र रञ्जित
