मुस्लिम धर्मावलम्बीया निगूगु तःधंगु नखः बकर इद (इदुल जोहा) थौं देय्न्यंकंया मस्जिदय् न्यायेकाच्वंगु दु।इदुल फित्र (रमजान पर्व क्वचाःगु) ७० क्वःगु दिनय् बकर इद न्यायेकेगु धार्मिक विधि दु।

मुस्लिम धर्मावलम्बीतय्सं थौं सुथ न्हापां म्वः ल्हुयाः सत्तिक च्वंगु मस्जिद बाय् इदगाहय् वनाः मंकाः कथं नमाज ब्वनेगु याइ। नमाज ब्वने धुंकाः थःथवंय् भिंतुना कालबिल यायेगु याइ। थुकिया लसताय् येँया दरबारमार्गय् च्वंगु नेपाली जामे मस्जिद, काश्मिरी मस्जिद लिसें देय्न्यंकंया मस्जिद व इदगाहय् मुस्लिम धर्मावलम्बीत तःल्याखय् मुनेगु याइ। हिजरी संवत् कथं १४३९ दँ न्ह्यः अल्लाहया आदेशय् इब्राहिमं थः काय् इस्माएल अलेह सलामयात बलिदान बिइत तयार जूग लुमंतिइ थ्व पर्व न्यायेकेगु यानाहःगु मुस्लिम आयोगया पूर्वअध्यक्ष निर्दोष अलीं जानकारी बियादिल।

मुस्लिम धर्म गुरु (मौलाना) रहमत अलीं ऐतिहासिक बकर इद पर्वया लिधंसा जुयाच्वंगु इब्राहिमया वंशय् सन् ५७१ य् मक्काय् मोहम्मद सलल्ला जन्म जुयाः निरन्तरता ब्यूगु धयादिल। गुकिं थ्व नखः छगू धर्मयात पुस्तान्तर यायेत महत्त्वपूर्ण योगदान यानाः हदिस नांया धर्मग्रन्थया रचना यानादीगु वय्कलं न्ह्यथनादिल। “उगु ग्रन्थयात आः वयाः मुस्लिम धार्मिक ब्वनेकुथि (मदरसा)य् नापं ब्वंकेगु यानाच्वंगु दु, मक्काय् जन्म कयादीम्ह सलल्ला ५३ दँ लिपा मदिनाय् बाय् हिलादीगु इतिहास दु। उकिया हे लुमन्तिइ नापं आः साउदी अरबय् लाःगु थुगु निगूलिं तीर्थस्थलय् तःधंगु मेला जुइगु यानाच्वंगु दु”, मौलाना अलीं धयादिल।

थ्व नखःया लसताय् मक्कामदिना वनेगु भिं तायेकातःगु कथं अन वनेत गृह मन्त्रालयं वयेवनेगु विमान टिकटया व्यवस्था यानाः हजयात्रा याकेगु याना च्वंगु दु। मक्कामदिना वनेमखंपिं हजयात्रीं नापं छेँय् छेँय् हे बकर इद न्यायेकेगु याइ। थ्व नखःया मू आज्जु हे हजयात्रा खः। थ्व पर्वय् अल्लाहयात लय्तायेकेत मुस्लिम धर्मं पाय्छि तायेकातःपिं पशुयात कुर्बानी (बलि) बिइगु याइ ।धार्मिक मान्यता कथं अल्लाहया नवी (दूत) इब्राहिम अलि सलामं ९० दँया बैँसय् कलाः हाजरापाखें जन्म जुम्ह सन्तान काय् इस्माइलयात कुर्बानी यायेमाःगु आदेश काल।

थुकियात पालना याःबले अल्लाह लय्तानाः इस्माइलया कुर्बानी मखुसें स्वर्ग (जनन्त) य् लहिनातःम्ह दुम्बाया कुर्बानी जूगु धार्मिक मान्यता दु। अथे जुयाः कुर्बानी यायेगु चलनयात न्यंकातःगु मुस्लिम धर्मावलम्बीया धापू दु। निःसन्तान इब्राहिमं सन्तानया निंतिं अल्लाहलिसे फ्वंगु धयातःगु दु। अल्लाहं सन्तान सुख ब्यूसा कुर्बानी बी धइगु इब्राहिमया बचं कथं अल्लाहं वय्कःयात परीक्षण यायेगु निंतिं म्हगसय् वयाः कुर्बानी यायेमाः धाःगु मुस्लिम धर्मावलम्बीया विश्वास दु। वय्कलं यक्वः हे पशुया कुर्बानी ब्यूसां अल्लाह लय्मतागुलिं दकसिबे लिपा थः यम्ह सन्तानयात हे कुर्बानी बिनाः अल्लाहयात लय्तायेकेत स्वःगु किंवदन्ती दु।

उगु इलय् वय्कःया परीक्षण ताःलाःगुलिं कुर्बानी यायेगु थासय् मनू मखु वहे जन्नतय् लहिनातःम्ह दुम्बाया कुर्बान (बलि) जूगु धयातःगु दु ।परम्परा कथं कुर्बानीया लायात स्वंगू ब्वय् इनेगु याइ। न्हापांगु ब्वः चिमि लिसें तसकं चिमि छेँजःपिंत, निगूगु ब्वः थः थःथिति पासापिनिगु निंतिं व स्वंगूगु ब्वः थःम्हेस्या नयेमाःगु मुस्लिम धार्मिक मान्यता दु। थ्वहे कथं थौं न्हापांगु दिंया बकर इद न्यायेकाच्वंगु दु।

Categorized in राष्ट्रिय