उपराष्ट्रपति रामसहायप्रसाद यादवलिसे नेपाःया निंतिं चीनया राजदूत चाङ माओमिङं बुधबाः लैनचौरया उपराष्ट्रपति ज्याकुथिइ नापलानादीगु दु।

नापलायेगु झ्वलय् वय्कःपिं दथुइ शान्तिपूर्ण मंकाः अस्तित्व, थःथवंय् सम्मान व दीर्घकालीन मैत्रीइ लिधना च्वंगु नेपाः व चीन स्वापू, आर्थिक ग्वाहालि लिसें भावी मंकाः ज्याया विषय सहलह जूगु उपराष्ट्रपतिया ज्याकुथिं धाःगु दु। उपराष्ट्रपति यादवं वंगु प्यंगू दसकय् चीनं ताःलाकूगु प्रगतियात च्वछानादिसें निगू देय् दथुइ व्यापार, पर्यटन, पूर्वाधार, ऊर्जा व प्रविधि हस्तान्तरणय् चिनियाँ साझेदारी आवश्यक जूगुलिइ बः बियादिल।

राजदूत चाङ माओमिङं चीन व नेपाः दथुया स्वापूयात अझ नं तः जाःगु च्वकाय् थ्यंकेत थः प्रतिबद्ध दूगु धयादिल। नेपाः लिसेया स्वापूयात चीनं उच्च प्राथमिकता बियागु धयादिसें वय्कलं निगूलिं देय्या जनताया समृद्धिया निंतिं थः क्रियाशील जुयाच्वनेगु धयादिल।

Categorized in राष्ट्रिय