येँया राजेन्द्र बज्राचार्यं ८ ल्याः मुंकुसें नविन्द्रराज जोशी स्मृति स्वक्वःगु फिडे ¥यापिड (१९०० क्वय्) चेस टुर्नामेन्ट त्याकूगु दु। जेठ १५ व १६ गते ९ चरणय् जूगु कासाय् उलि हे ल्याः हःम्ह रुकुमया मिलन रोका टाइब्रेक ल्याखं निगूगु व मोराङ्का उमेश राई स्वंगूगु थाय् कायेत ताःलात।

चितवनया सन्तोष गौत्तम, पाँचथरया महेन्द्रकुमार साम्बाहाम्फे, येँया जनार्दन श्रेष्ठ, काभ्रेया योगेश श्रेष्ठ, येँया रमेश वीर माली, झापाया डा. सुशन गौत्तम व दोलखाया कविन्द्र शिवाकोटी कथहं प्यंगूगुनिसें झिगूगु थासय् लायेत ताःलात। मिसापाखे चितवनया पूर्णिमा गुरुब् ५.५ ल्याखं उत्कृष्ट कासामि जुयादिलसा खोटाबया कुसुम घिसिब निम्हम्ह व येँया पञ्च्या बोलल्चा स्वम्हम्ह उत्कृष्ट मिसा कासामि जुयादिल।

समापन ज्याझ्वलय् वडा नम्बर २४ या नायः विनोद कुमार राजभण्डारीं न्हाप, ल्यू, लियांल्यू, प्यंगूगु व न्यागूगु थासय् लाःपिन्त कथहं ३० हजार, २० हजार, १५ हजार, १० हजार व ८ हजार तकालिसें ट्रफी, पदक व प्रमाण पत्र लःल्हाःगु खः। थुकथं हे खुगूगुनिसें झिगूगु थासय्तक लाःपिन्त म्हतिं ६ हजार तका लःल्हाःगु खः। हरेक प्रदेशपाखें छम्ह छम्ह उत्कृष्टकासामि घोषित जूपिन्त म्हतिं ५ हजार तका सिरपाः ब्यूगु खः। कासाय् वडा नं. २४ पाखें निम्ह स्थानीय कासामि, मनपादुनें निम्ह कासामियात स्थानीय उत्कृष्ट कासामिकथं हंगु खः। धर्मपथय् च्वंगु सांस्कृतिक छेँय् म्हितूगु कासाय् ५ गू देय्या २२६ म्हेसिया ब्वति दुगु खः।

विश्व वुद्धिचाल महासंघ, एशियन चेस फेडरेसन व नेपाल चेस फेडरेसनलिसे सहकार्यय् येँ मनपाया वडा नं. २४ पाखें ग्वसाःग्वःगु कासाय् भारत, अमेरिका, बेलायत व फ्रान्सया ११ म्ह नेपाःया ४८ जिल्लां २१५ म्हकासामिपिसं ब्वति काःगु खः।विश्व वुद्धिचाल महासंघं विश्वाश याइगु स्तरया कासा ग्वसाः ग्वयागु हुनिं जिमिसं स्वदँतक नियमित ज्याझ्वः न्ह्याकागु दु।

थुकियात वइगु दँय् नं नियमितता बीगु जुइ।’ समापन ज्याझ्वलय् नुगःखँ तसें वडाध्यक्ष विनोद कुमार राजभण्डारीं धयादिल, स्थानीय कासामियात अन्तर्राष्ट्रिय स्तरया कासाय् ब्वति कायेकेगु ह्वःताः सिर्जना जुया वनी। थ्व झ्वलय् झी अग्रज, सामाजिक व सांस्कृतिक पक्षयात प्रवद्र्धन यायां वनेगु जुइ ।’ प्रतिस्पर्धाया अनुभूति जुगु खँ न्ह्यथसे भारतीय कासामि पंकज श्रीवास्तवं, बालागु कासा ग्वसाः ग्वःगुलिं थः लिपाया धेंधेंबल्लाखय् ब्वति कायेत उत्साहित जुयागु खँ कनादीगु खः।

कासाया प्रमुख निर्णायक (इन्टरनेशनल आर्बिटर) ज्ञानेन्द्र खाइजुं कासाया बारे जानकारी बियादिसें धयादिल, स्वीस लिग प्रणालीइ हरेक त्याःगु कासाया निंतिं १ नम्बर बी सा बराबर जुल कि ०.५ अंक दइ। थ्व हे प्रणालीं कासा म्हितकूगु खः।’

Categorized in कासा