चक्रमान डंगोल स्मृति प्रतिष्ठानया ग्वसालय् समाजसेवी मदुम्ह चक्रमान डंगोलया झ्वाता आइतवाः उलेज्या याःगु दु।

येँ मनपा १२ वडाया ग्वाहालिं दय्कूगु झ्वाताया उलेज्या येँ मनपा १२ वडाया अध्यक्ष बालकृष्ण महर्जनं यानादीगु खः । ज्याझ्वलय् नुगःखँ तयादिसें येँ मनपा ११ वडाया अध्यक्ष हिरालाल तण्डुकारं चक्रमान डंगोललिसे वय्कः वडाअध्यक्ष जुयादीबलय् यानादीगु सहकार्ययात लुमंकुसें थौं बागमति व विष्णुमति करिडोरया कल्पना वय्कःया हे देन जूगु खँ कुलादिल।

राजनीतिक रुपं जक मखु आर्थिक ख्यलय् नं वय्कलं पलाः न्ह्याकादीगु खँ कुलादिसें वय्कलं न्ह्याकूगु सहकारी जयकिसान हित बहुमूखि सरकारी संस्थाय् थम्हं बुँ मियाः वःगु ध्यबा जम्मा यानागु व उकिया प्रतिफल वय्कलं धाःकथं हे लित ब्यूगु खँ नं लुमंकादीगु खः।ज्याझ्वलय् नुगःखँ तयादिसें येँ मनपा १२ वडाया अध्यक्ष बालकृष्ण महर्जनं सालिक उलेज्या जूगु थाय्या बारे कनादिसें न्हापा फोहरं जाःगु थाय् वय्कःया हे कुतलय् सुचुकुचु जूगु खँ कनादिल।

ज्याझ्वलय् ज्यापु महागुथि नेपाःया केन्द्रीय नायः सत्य नारायण डंगोल, ज्यापु संस्कृति विकास कोषया नायः मंगल कृष्ण सिं, ज्यापु महागुथि नेपाः येँ महानगर समितिया नायः पञ्च नारायण महर्जन, वडाया दुजःपिं, थीथी त्वाःया नायःपिं व थीथी खलःपुचःया नायःपिनिलिसें स्थानीय समाजसेवी पिनिगु ब्वति दुगु खः।थुगु हे लसताय् चक्रमान डंगोल स्मृति पार्कया नं उलेज्या वडा अध्यक्ष डंगोलं यानादीगु खः।

ज्याझ्वः सुथां लाकेत खोल्चापाखा स्पोर्टस् क्लब व श्री रुद्रविनायक संरक्षण समाजया ग्वाहालि दुगु खः ।ज्याझ्वः प्रतिष्ठानया नायः न्हुछे महर्जनया सभापतित्वय् न्ह्याःगु खः।

Categorized in राष्ट्रिय