प्रधानमन्त्री बालेन साहया वंगु आइतवाः संसदय् बिउगु अभिव्यक्तियात कयाः देय्न्यंकं विरोध जुयाच्वंगु दु । वंगु आइतवाः प्रधानमन्त्री संसदय् सांसदतय्सं न्यंगु न्ह्यसःया लिसः बीगु झ्वलय् नेपालं भारतीय भूमि अतिक्रमण यानाच्वंगु खँ थः प्रधानमन्त्री जुइवं सिउगु धकाः बिउगु अभिव्यक्तियात कयाः राजनीतिक पार्टीया लिसे परराष्ट्र व सीमाविद् पिसं आपत्ति प्वंकूगु दु।थ्वहे झ्वलय् एमालेया प्रतिनिधिसभा दुजः कुलभक्त शाक्यं प्रधानमन्त्री साहया अभिव्यक्ति संवेदनशील, गैरजिम्मेवार व विवादास्पद अभिव्यक्ति जूगु खँ धयादीगु दु।

वय्कलं धयादिल, ‘प्रधानमन्त्रीया अभिव्यक्ति नेपाःया सार्वभौमिकता, भौगोलिक अखण्डता व अन्तर्राष्ट्रिय छवि हे लिच्वः लाइ। प्रधानमन्त्रीया अभिव्यक्ति तथ्यहीन व राष्ट्रिय हित अः खः आः तक नेपालं गनं नं सुयागु भूभाग मिचे याःगु मदु। नेपालं फुक्क जःलाखःला देय्या सार्वभौमिकताया सम्मान याना वयाच्वंगु द। गनथाय्या भाग नेपालं मिचे याःगु खः धकाः प्रधानमन्त्री धाये फयेकेमाः। सीमाना थेंज्याःगु विषययात हचुवाया भरं थुकथं न्ववायेगु ज्या गलत जूगु दु।’ थ्वहे झ्वलय् भारतीय न्हिपौ दैनिक जागरणं भारतीय भूभाग नेपालं गबलयय् नं मिचे मयाःगु खँ च्वःगु दु ।

उगु न्हिपतिइ भारत सरकारं नेपाःया धापूयात खारेज यासें स्पष्ट याःगु दुकि नेपालं गबलें नं थज्याःगु ज्या मयाःगु व लिपा नं याइ मखु धकाः च्वयातःगु दु। उकथं हे उगु न्हिपतिइ नेपाः व भारतया सीमानाय् शान्ति कायम यायेमाःगु धासें निगू देय् दथुइ ऐतिहासिक, सांस्कृतिक, आर्थिक सम्बन्ध व सीमा सम्बन्धी खँय् शान्ति कायम यायेमाःगु खँय् बः बियातःगु दु्।थ्वहे झ्वलय् नेपाली कम्युनिष्ट पार्टीया नेता झलनाथ खनालं प्रधानमन्त्री साहं ‘नेपालं भारत जग्गा मिचे याःगु धकाः बिउगु अभिव्यक्ति गलत व राष्ट्र विरोध जूगु खँ धयादीगु दु।

वय्कलं प्रधानमन्त्रीया अभिव्यक्तियात ‘खतरनाक’ धासें साहयात प्रधानमन्त्रीया कुर्सी च्वनेत तकं योग्य मजूगु खँ धयादीगु दु। खनालं सामाजिक सञ्जाल फेसबुकय् च्वःगु दु, ‘झी नेपाः जनता युगौं निसे विदेशी अतिक्रमण विरुद्ध संघर्ष याना वयाच्वनागु व आः नं झीगु देय् अतिक्रमण लानाच्व.गु दु । अज्याःगु ज्यायात हलुका दयेकेगु व विदेशीया चाकडी यायेगु ल्याखँ अभिव्यक्ति बीगु राष्ट्र विरोधी ज्या खः । वय्कलं गुगु तथ्य, छु प्रमाण व गुगु दस्तावेजया आधारय् थज्याःगु खतरनाक अभिव्यक्ति बिउगु खः?’उकथं हे नेता खनालं प्रधानमन्त्रीया धापू प्रति माफी फ्वनेमाःगु माफी मफ्वंतले प्रधानमन्त्रीया भत्र्सना यायेत नं देशभक्त जनतायात इनाप यानादीगु दु।

थ्वहे झ्वलय् प्रधानमन्त्री साहया अभिव्यक्ति त्रुटिपूर्ण जूगु निष्कर्ष पिकासें विपक्षी दलतय्सं प्रधानमन्त्रीं संसदय् वयाः प्रष्टीकरण बीत माग याःगु दु । म्हिगः प्रमुुख प्रतिपक्षी दल कांग्रेसया आह्वानय् च्वंगु बैठकं उगु माग याःगु दु । प्रमुख प्रतिपक्षी कांग्रेस, एमाले, नेकपा, श्रम संस्कृति व राप्रपाया बैठक लिपा उगु माग याःगु खः। बैठक लिपा नेकपाया प्रमुख सचेतक युवराज दुलां सीमा अतिक्रमण सम्बन्धी प्रधानमन्त्रीं सदनय् बिउगु अभिव्यक्ति राष्ट्रघाती जूगु निष्कर्ष पिकाःगु जानकारी बियादीगु दु। वय्कलं प्रधानमन्त्री सदनय् वयाः जनतायाके माफी फ्वनेगुया लिसे प्रधानमन्त्रीया अभिव्यक्ति संसदया रेकर्डं चीकेमाःगु माग नं यानादीगु दु।

उकथं हे सीमा विवादयात कयाः श्रम संस्कृति पार्टीं आपत्ति प्वंकूगु दु। पार्टी अध्यक्ष हर्क साम्पाङं म्हिगः विज्ञप्ति जारी यासें प्रधानमन्त्रीया अभिव्यक्तिं सरकार सीमा रक्षा व भौगोलिक अखण्डता प्रति प्रतिबद्ध मजूगु स्पष्ट जूगु धासें आपत्ति प्वंकूगु दु।प्रधानमन्त्रीया अभिव्यक्ति सीमा मिचे याःगु खँयात रफादफा यायेगु बदनियत खनेदुगु खँ धयातःगु दु। स।ाम्पाङं च्वःगु दु, ‘सीमा मिचे याःगु खँयात रफादफा यायेगु, लिपुलेक लिम्पियाधुरा लित बीमाः धइगु झीगु मागयात सामसुम यायेत, नेपाःया आपालं भूमि भारतयात त्वःतेमाःगु राष्ट्रघाती बदनियत प्रष्ट जूगु दु।’