राष्ट्रपति रामचन्द्र पौडेलं जातीय भेदभाव लिसें छुवाछूत उन्मूलन राष्ट्रिय दिवसया लसताय् भिंतुना देछानादीगु दु।

राष्ट्रपति पौडेलं थौं भिंतुना सन्देश जारी यानादिसें दिवसया लसताय् स्वदेश लिसें विदेशय् च्वनादीपिं सकलें नेपाःमिपिं तताकेँहे लिसें दाजुकिजापिनिगु सुख, शान्ति, समृद्धि व सामाजिक सद्भावया निंतिं भिंतुना देछानादीगु दु। वय्कलं धयादीगु दु, “थुगु दिवसं मानव मर्यादा, समानता व सामाजिक न्यायया संरक्षण लिसें प्रवद्र्धन यासें विभेदहीन, समावेशी व सभ्य समाज निर्माणप्रति झी सकसितं थप प्रतिबद्ध जुइत हःपाः ब्यूगु दु।”

विसं २०६३ जेठ २१ गते नेपाल सरकारं देय्यात ‘जातीय छुवाछूत मुक्त राष्ट्र’ घोषणा याःगु दिंया लुमन्तिइ दँय्दसं जेठ २१ गतेयात ‘जातीय भेदभाव लिसें छुवाछूत उन्मूलन दिवस’या कथं न्यायेका वयाच्वनागु दु। राष्ट्रपति पौडेलं नेपाःया संविधानय् बहुजातीय, बहुभाषिक, बहुधार्मिक, बहुसांस्कृतिक लिसें भौगोलिक विविधतायुक्त विशेषतायात आत्मसात् यानाः विविधता दथुया एकता, सामाजिक सांस्कृतिक ऐक्यबद्धता, सहिष्णुता व सद्भावयात संरक्षण लिसें प्रवद्र्धन यासें वर्गीय, जातीय, क्षेत्रीय, भाषिक, धार्मिक, लैङ्गिक लिसें फुक्क कथंया विभेदया अन्त्य यानाः आर्थिक समानता, समृद्धि व सामाजिक न्याय सुनिश्चित यायेत समानुपातिक समावेशी लिसें सहभागितामूलक सिद्धान्तया आधारय् समतामूलक समाजया निर्माण यायेगु सङ्कल्प यानातःगु न्ह्यथनादीगु दु।

जातीय विभेद लिसें छुवाछूत थें जाःगु अमानवीय व्यवहारया अन्त्य केवल कानुनी व्यवस्था पाखें जक सम्भव मजुइगु धयादिसें राष्ट्रपति पौडेलं उकिया निंतिं समाजया फुक्क तगिं÷वर्गय् चेतना, सहिष्णुता व पारस्परिक सम्मानया भावना विकास जुइमाःगु धयादीगु दु । दिवसं विविधता दुनेया एकतायात सुदृढ यासें समतामूलक, सभ्य व समावेशी समाज निर्माणय् सकलें नेपाःमि छधीछप्प जुइमाःगु आवश्यकता दूगु लुमंका बियादीगु वय्कःया धापू दु।

“जातीय विभेद सामाजिक, नैतिक लिसें मानवीय गरिमा विरुद्धया अपराध खः, सामाजिक जागरण व सकसिके समभावया विकास यायेत फुक्क जात–जाति व समुदाय दथुइ थःथवंय् सद्भाव, मेलमिलाप व ग्वाहालिया भावना तब्याकाः यंकाः समतालिसेंया राष्ट्रिय एकतायात सुदृढ दयेकेत व जातीय छुवाछूत लिसें विभेदया विरुद्ध दृढ जुयाः धस्वाःसें लोकतान्त्रिक राज्य प्रणालीयात सार्थक दयेकेत सकलें व्यक्ति, परिवार, समाज, स्वंगूलिं तगिंया सरकारी निकाय, राजनीतिक दल, राष्ट्रिय लिसें अन्तरराष्ट्रिय गैरसरकारी सङ्घसंस्था, नागरिक समाज व सञ्चारकःमियात अझं अप्वः संवेदनशील जुइत दुनुगलं निसें आह्वान यानाच्वना”, सन्देशय् न्ह्यथनातःगु दु।

Categorized in राष्ट्रिय