यादव उपराष्ट्रपति रामसहायप्रसाद यादवं विभेदरहित समाज हे समृद्ध नेपाः निर्माणया लिधंसा जूगु न्ह्यथनादिसें थुखेपाखे सकलें पक्ष सचेत जुइमाःगु धयादीगु दु।

वय्कलं ‘जातीय भेदभाव लिसें छुवाछूत उन्मूलन राष्ट्रिय दिवस, २०८३’या लसताय् थौं देय्दुने नापनापं विदेशय् च्वनादीपिं सकलें नेपाःमि तताकेँहे लिसें दाजुकिजापिंत भिंतुना देछानादिसें थथे धयादीगु खः। वय्कलं धयादीग दु, “नेपाःया संविधानं थुकियात दण्डनीय अपराधया कथं परिभाषित यासें सकलें नागरिकयात समान अधिकार व ह्वःताः प्रत्याभूत याःगु दु, अथे खःसां कानुनी व्यवस्थां जक मगाः, सामाजिक चेतना, सांस्कृतिक रुपान्तरण, शिक्षा व नागरिक सक्रियता नापं उतिकं माः ।”

विसं २०६३ जेठ २१ गते नेपाःया ‘जातीय छुवाछूत मुक्त राष्ट्र’ घोषणा याःगु ऐतिहासिक दिंया लुमन्तिइ लिसें हनाय् दँय्दसं देय्न्यंकं थीथी ज्याझ्वःत ग्वसाः ग्वयाः थ्व दिवस न्यायेकेगु याइ। उपराष्ट्रपति यादवं सामाजिक न्याय, समानता व मानव अधिकार सुनिश्चितताया निंतिं थ्व छगू महत्वपूर्ण दिवस जूगु न्ह्यथनादिसें सकलें नागरिकं समान ह्वःताः काये दइगु व सम्मान तयाः म्वाये दइगु हे सभ्य समाजया लिधंसा खः धयादीगु दु।

जातीय भेदभाव व छुवाछूतया हुनिं न्हापान्हापा यक्वः समुदाय शिक्षा, रोजगारी, आर्थिक ह्वःताः व सामाजिक सहभागिता पाखें तापानाः च्वनेमाःगु न्ह्यथनादिसें वय्कलं संविधानं प्रत्याभूत याःगु मेगु ऐतिहासिक पाटा बहुजातीय, बहुभाषिक लिसें बहुसांस्कृतिक विशेषतायात नालाकयाः जातीय छुवाछूत अन्त्य यानाः समतामूलक समाज निर्माण यायेगु सङ्कल्प लिसें न्ह्याः वनेगु थौंया आवश्यकता जूगु उपराष्ट्रपति यादवं धयादीगु दु।

थ्व दिवस छगू लुमन्तिया निंतिं जक मखुसें नेपालय् आर्थिक समानता, समृद्धि व सामाजिक न्याय सुनिश्चित यासें छुवाछूतमुक्त, सभ्य व समतामूलक समाज निर्माण यायेगु झीगु दृढ सङ्कल्पया चिं जूगु उपराष्ट्रपति यादवया धापू दु। दिवसं भेदभाव विरुद्धया सः बल्लाकाः यंकाः समानता व न्यायया पक्षय् दृढ जुइत लिसें समावेशी समाज निर्माण योगदान बिइत सकलें नागरिकयात उत्प्रेरित याइगु वय्कःया विश्वास दु।

Categorized in राष्ट्रिय