नेपालभाषा मंकाः खलः, यल पाखें २१ क्वःगु शताब्दी बय् बय् जुयाच्वंगु एआई, आईटी, डिजिटल मार्केटिङ व सीपमूलक विषययात कयाः शनिवाः निसें झिन्यान्हुयंकया तालिम न्ह्याःगु दु।

यल महानगरपालिका वडा नम्बर ७ या ग्वाहालि न्ह्याकूगु तालिमया उलेज्या कावा नायः देवेन्द्र शाक्यं यानादीगु खः। एसईई क्वचायेका च्वंपिं ल्याय्म्ह निसें स्वीन्यादँ दुनेया प्रशिक्षार्थीपिंत आधुनिक प्रविधि नाप स्वानाः लजगाः व स्वरोजगारया ह्वताः चूलाकेगु तातुना ज्याझ्वः न्ह्याकूगु खः। थुगु ज्याझ्वः सयेकेगु निंतिं स्वीप्यम्ह ब्वति काःगु दु।तालिमय् आर्टिफिसियल इन्टेलिजेन्स, इन्फर्मेशन टेक्नोलोजी, डिजिटल मार्केटिङ, सामाजिक सञ्जाल व्यवस्थापन, कन्टेन्ट सामग्री निर्माण, अनलाइन प्रवद्र्धन व डिजिटल व्यवस्थापनया थीथी पक्ष दुतिनां सैद्धान्तिक, व्यवहारिक व न्हियान्हिथं छ्यलाबुला जुइक ज्ञां बीगु आज्जु तयातःगु दु।

नेपालभाषा मंकाः खलः, यलया थःगु हे मंकाः दबू छेँ न्ह्याःगु तालिम उलेज्याझ्वलय् सभानायः भाजु महेन्द्रलाल महर्जनज नेवाः मस्तय्त नेपालभाषा ल्हायेगु, च्वयेगु, ब्वनेगु नापनापं ई कथं प्रविधि लिसे भ्यलय् पुकेमाःगु खँ न्ह्यथानादीगु दु। स्यनामि राजेश महर्जनं थुगु तालिम ज्याझ्वः थांैया लकसय् तसकं मदयेकं मगाःगु व तालिम पूवनीगु न्हि खुन्हु प्रशिक्षार्थी सकसिनं वाःचायेकी धयादीगु दु । ज्याझ्वःया कजिं मय्जु रमना महर्जन वज्राचार्यं मद्दिक ब्वनेकुथिइ च्वनाः सयेका सिइका जीवनय् छ्यलेफइगु कथं कुतः यायेमाःगु खँय् बः बियादीगु दु। ज्याझ्वः नेपालभाषा मंकाः खलः, यलया छ्याञ्जे राजु ताम्राकार (तमों) न्ह्याकादीगु खः।

तमों तालिमं आधुनिक प्रविधिया प्रभावकारी प्रयोग, डिजिटल माध्यम पाखें व्यवसाय प्रवद्र्धन नापं न्हून्हूगु ह्वःताः चूलाकाः रोजगारी अप्वयेकीगु भलसा कयादिल। ज्याझ्वलय् निवर्तमान नायः हिराकाजी महर्जन, वडाया जनप्रतिनिधि देवेन्द्र महर्जन, शान्ति महर्जनपाखें भिन्तुना देछानादीगु खः। नेपालभाषा मंकाः खलः यलया ल्यू दाँभरि प्रेम महर्जन (चिरि) या व्यवस्थापनय् ज्याझ्वः न्ह्याःगु खः। 

Categorized in राष्ट्रिय