येँ महानगरपालिका २३ वडाय् थीथी ज्याझ्वः याःगु दु । मचा साहित्यकार शान्तदाश मानन्धरया लुमन्तिइ अन्तर स्कुल चिनाखँ व च्वखँ धेधेंबल्ला कासा जुल।उगु धेधेंबल्ला कासाय् आपालं स्कुलया विद्यार्थीपिसं ब्वति काःगु खः।

धेधेंबल्लाय् नेपालभाषा चिनाखँ पाखे विश्वनिकेतन माविया आमूल अधिकारी न्हाप लाःगु खःसा कन्या मन्दिर माविया सोफिया डंगोल लिउ, महांकाल माविया आराधना खड्का लियांलिउ व शान्ति निकुञ्च माविया सुशीला जैसीयात हःपाः सिरपाः लाःगु खः। अथेहे नेपालभाषा च्वखँपाखें ज्ञानोदय माविया वर्षा श्रेष्ठ न्हाप, नेपाल आदर्श माविया प्रिति साह लिउ, जगतसुन्दर ब्वनेकुथिया याङ्गचेन लामा लियांलिउ व पद्मकन्या विद्याश्रम माविया अरुणा महतयात हःपाः सिरपाः लाःगु खः।खस नेपाली भाय्या च्वखँ पाखे श्री रत्नराज्य माविया मुकेश जोशी न्हाप, विजेश्वरी ज्ञानमन्दिर सैनिक महाविद्यालयया सुवास्ना खड्का केसी लिउ, श्रीरत्न राज्यया हे सदीक्षा न्यौपाने लियांलिउ व विजेश्वरी ज्ञानमन्दिर सैनिक माविया प्रजिश कार्कीयात हःपाः सिरपाः लाःगु खः।

अथेहे खस नेपाली भाय् चिनाखँय् न्यू जेनिथ इंग्लिस मोडल स्कुलया सन्देश गौतम न्हाप, जनकल्याण माविया स्मारिक बलायर लिउ, विश्व निकेतन माविया कृति गौतम लियांलिउ व नेपाल आदर्श माविया युवराज शाहयात हःपाः सिरपाः लाःगु खः। धेंधेंबल्लाखय् च्वखँपाखे न्हाप, लिउ, लियांलिउ व हःपाः लाःपिंत छसिकथं झिंन्याद्वः, झिद्वः, न्हय्न्यासः व न्याद्वः तका दां सिरपाः बिउगु खःसा चिनाखँपाखे झिद्वः, न्हय्न्यासः, न्याद्वः व नीन्यासः दां सिरपाः बिउगु खः। अथेहे प्यंगुलिं विधाय् निम्ह निम्हेसित यानाः च्याम्हेसित प्रोत्साहन कथं द्वःछि द्वःछि तकाया विशेष सिरपाः नं लःल्हाःगु खः ।

येँया छत्रपार्टी पार्टी प्यालेसय् जूगु सिरपाः लःल्हायेगु ज्याझ्वलय् न्हाप, लिउ व लियांलिउ लाःपिंसं चिनाखँ व च्वखँ ब्वनाः न्यंकूगु खः। उकथं हे वंगु शनिवाः २३ वडाया वार्षिक ज्याझ्वःया समापन राष्ट्रिय सभा गृहया हलय् जुल । थुगु आर्थिक वर्ष ०८२÷०८३ या वार्षिक ज्याझ्वः समापन, विशिष्ट व्यक्ति हनेगु व सांस्कृतिक ब्वज्या नं याःगु खः ।ज्याझ्वःया उलेज्या नापं लसकुस यासें २३ वडा अध्यक्ष मचाराजा महर्जनं थुगु ज्याया उद्देश्य ध्वाथुइका ब्यूगु दु। अथेहे वडाय् जुइधुंकूगु थीथी उपलब्धी अध्यक्ष महर्जनं कनादीगु दु।

वय्कलं अध्यक्षया भाला काये धुंका बजेटया ९९ प्रतिशत ज्या क्वचाःगु कनादिल। वार्षिक ज्याझ्वःकथं थुगु आर्थिक दँय् युवा व मिसापिनिगु आत्मबल, मनोबल विकासया नापनापं इमित थीथी श्रम, सीप, क्षमता विकास यायेगु कथंया थीथी ज्याझ्वः यानागु जानकारी नं बिउगु खः।अथेहे सामाजिक, प्रशासनिक, साहित्यिक, सांस्कृतिक, सांगीतिक, खेलकुदथें जाःगु क्षेत्रयापिं २३ वडाया थी थी विशिष्ट व्यक्तिपिं परराष्ट्रविद् हिरण्य लाल श्रेष्ठ, चित्रकार किरण मानन्धर, बरिष्ठ साहित्यकार प्रतिसरा साय्मि, उपन्यासकार शशिकला मानन्धर, वरिष्ठ म्ये हालामि प्रवेशमान शाक्य, चर्या गुरु स्वयम्भु रत्न शाक्य, मदन मानन्धर, म्ये हालामि किरण मानन्धरलगायतपिंत अध्यक्ष महर्जन व वडा सदस्यपिसं हनापौ लःल्हाःगु खः ।

उगु हे ज्याझ्वलय् थीथी खलः, पुचलं न्ह्यब्वःगु चर्या नृत्य, धिमे प्याखँ, हुलाप्याखँ, बाद्यबादक बाबुराजा महर्जनपाखें प्रशिक्षित जूपिनिगु दाफा, धिमे, बाँसुरी आदि मंकाः ब्वज्या नं याःगु खः।अथे हे दैसा त्वाः सनागु खलः मिसा पुचः उत्कृष्ट महिला उद्यमी जुइत ताःलागुलिइ न्ययद्वः तकाया चेक लःल्हाःगु दु।

Categorized in राष्ट्रिय