नेपाल प्रहरीं येँया टोखापाखें ब्राउनसुगर व छगू लख तका ध्यबालिसें छम्हेसित ज्वंगु दु। जिल्ला प्रहरी परिसर येँ व प्रहरी प्रभाग न्हू बसपार्कया पुचलं २०.६४ ग्राम लागुवासः ब्राउनसुगर व छगू लख झिंन्याद्वः तका ध्यबालिसें सुनसरीया धरान उपमहानगरपालिका–१५ स्थायी छेँ जुयाः थौं कन्हय् येँया टोखाय् च्वनेगु यानाच्वंम्ह ३८ दँ दुम्ह युगसाङ राईयात ज्वंगु खः।

जिल्ला प्रहरी परिसर येँया प्रवक्ता लिसें प्रहरी उपरीक्षक पवनकुमार भट्टराईं थःगु क्वथाय् लागु वासः सुचुकाः तयातगु धइगु गोप्य सुचंया लिधंसाय् चेक जाँच याना स्वबले उगु ल्याखय् ब्राउनसुगर व ध्यबाः लूगु जानकारी बियादिल। प्रहरीं ज्वंम्ह राईपाखें ब्राउनसुगर, नेपाली ध्यबाया नापनापं निद्वः व निसः तका भारतीय ध्यबा, छगू डिजिटल ताल्जु व छगः मोबाइल नापं बरामद याःगु दु।

ज्वनातम्हेसिया सम्बन्धय् आवश्यक अनुसन्धान जुयाच्वंगु प्रवक्ता भट्टराईं धयादिल।

Categorized in अपराध