येँ महानगरपालिकां थःगु भौगोलिक लागायात ‘सडक सहयोगापेक्षी मानवमुक्त’ घोषणा याःगु दु।

सोमबाः ग्वसाः ग्वःग छगू ज्याझ्वलय् कार्यवाहक प्रमुख सुनिता डङ्गोलं ‘सु बेसहारा, येँ महानगरपालिकाया अभिभारा’ नारातयाः ‘सतक सहयोगापेक्षी मानवमुक्त सहर’ घोषणा यानादिल।वय्कलं अभियानयात सुथांलाक्क कार्यान्वयनया निंतिं नेपाल प्रहरी, जिल्ला प्रशासन ज्याकुथि व मानव सेवा आश्रमलिसे सम्झौता यानादीगु दु। छुं दिँ लिपा सतक बाय् सार्वजनिक थासय् खनेदये फइपिं ग्वाहालि माःपिनिगु व्यवस्थापनया निंतिं स्वापू, सम्बन्ध, ग्वाहालि व समन्वय लिसें एकीकृत प्रणालीया पाखें सञ्चालन यायेगु तातुना याःगु सम्झौताय् महानगरया पाखें कार्यवाहक प्रमुख डङ्गोल, नेपाल प्रहरीया पाखें प्रहरी महानिरीक्षक दानबहादुर कार्की, जिल्ला प्रशासन ज्याकुथिया पाखें प्रमुख जिल्ला अधिकारी ईश्वरराज पौडेल व मानव सेवा आश्रमया पाखें नायः रामजी अधिकारीं ल्हाःचिं तयादिल।

सम्झौता लिपा थःगु बिचाः प्वंकादिसें कार्यवाहक प्रमुख डङ्गोलं येँयात सांस्कृतिक सहरया नापनापं मानवताय् लिधना च्वंगु सहरया कथं म्हसिका पलिस्था यायेगु निंतिं ‘सडक सहयोगापेक्षी मानवमुक्त काठमाडौँ’ घोषणा यानागु धयादिल। ज्याझ्वलय् पूर्वगृहमन्त्री नारायणकाजी श्रेष्ठं मानवता प्रवद्र्धनय् आः कमजोरी याये मज्यूगु धयादिल। थुगु ज्याय् सकलें जिम्मेवार जुइमाःगुलिइ वय्कलं बः बियादिल। महानगरपालिकां विसं २०७४ निसें मानव सेवा आश्रमलिसे मंकाः ज्याय् औसतय् दच्छिया थ्यंमथ्यं निगू क्वति तका खर्च यानाच्वंगु दु। ज्याझ्वलय् मानवसेवा आश्रम व आनी छोइङ डोल्मा फाउन्डेसनं सञ्चालन यानाच्वंगु मेची महाकाली अभियानया नापं समापनया घोषणा याःगु खः।

थुगु ईया दुने सच्छि व ९७ म्ह ग्वाहालि माःपिनिगु उद्धार व व्यवस्थापन यानागु धकाः मानवसेवा आश्रमया नायः अधिकारीं जानकारी बियादिल। फाउन्डेसनया नकिं आनी छोइङ डोल्मां मानवता प्रवद्र्धनया निंतिं महत्त्वपूर्ण सम्झौता जूगु धासें थुगु दिंयात थःम्हेस्यां पवित्र दिंया कथं लुमंका तयेगु धयादिल। ज्याझ्वलय् वरिष्ठ मुटुरोग विशेषज्ञ डा भगवान कोइराला, वरिष्ठ कलाकार मदनकृष्ण श्रेष्ठ, संस्कृतिविद् लिसें आश्रमया संरक्षक डा गोविन्द टण्डन लिसेंयापिंसं नं थःथःगु बिचाः प्वंकादीगु खः। सम्झौताया पक्षत व मेमेगु सम्बद्ध निकाय लिसें पदाधिकारीपिनिगु नियमित बैठक, सम्झौताया प्रभावकारी कार्यान्वयन योजना, ज्याझ्वः लिसें स्रोतसाधनया प्रबन्ध मिले यायेत छगू समन्वय समिति दइगु धयातःगु दु। 

Categorized in राष्ट्रिय