येँ महानगरपालिकां नगरसभाया १९ क्वःगु अधिवेशन जेठ ३१ गते आइतबाः सुथसिया ११ ताःईया निंतिं इनाप याःगु दु। म्हिगः येँमपा प्लाजाय् च्वंगु सभा कक्षय् कार्यवाहक प्रमुख सुनिता डङ्गोलया सभाध्यक्षताय् च्वंगु ५० क्वःगु कार्यपालिका बैठकं नगरसभाया बैठकया न्हि व ई क्वःछ्यूगु धाःगु दु।

बैठकं नेपाल भाषाया बालविकास लिसें पूर्वप्राथमिक तगिंया पाठ्यक्रम स्वीकृत याःगु दु। शिक्षा लिसें स्वास्थ्य समितिया कजि चिनीकाजी महर्जनया संयोजकत्वय् नीस्वंगु नेपाल भाषाया पाठ्यक्रम लिसें स्थानीय पाठ्यपुस्तकय् समसामयिक संशोधन लिसें परिमार्जन याःगु खः। जेठ ४ गते च्वंगु समितिया बैठकं शिक्षा लिसें स्वास्थ्य समिति संशोधन न्ह्यब्वःगु खः। शिक्षा लिसें स्वास्थ्य समितिं जेठ २५ गते बैठक च्वनाः नेपाल भाषाया स्थानीय विषय नेपालभाषा, बालविकास लिसें पूर्वप्राथमिक तगिंया पाठक्रम स्वीकृतया निंतिं कार्यपालिका न्ह्यने न्ह्यब्वयेगु निर्णय जूगु खः।

समितिया पाखें बैठकय् प्रस्ताव न्ह्यब्वसें शिक्षा अधिकारी नमराज ढकालं, येँमपाया नेपाल भाषा, स्थानीय विषय, नेपाल भाषाया बालविकास लिसें पूर्वप्राथमिक तगिंया पाठक्रम स्वीकृत यायेत न्ह्यब्वयागु धयादिल। बैठकय् सामाजिक समितिया कजि रामकुमार केसी, सम्पदा लिसें पर्यटन समितिया कजि आशामान सङ्गत, विधायन समितिया कजि मचाराजा महर्जन व वडा नं. ६ या अध्यक्ष भुवन लामां सुकुमवासी लिसें स्ववासी व्यवस्थापनया विषयय् थःथःगु वडाया समस्यायात प्रतिनिधि घटनाया कथं न्ह्यब्वया सहजीकरण समिति नीस्वनेगु, स्ववासीयात सुकुमवासीया व्यवहार याःगुलिं उकियात भिंकेगु, स्ववासी जुयाः सम्पत्ति मदुपिं व्यक्ति लिसें परिवारया विवरण सङ्कलन यायेमाःगु बिचाः तयादिल।

सम्पदा लिसें पर्यटन समितिया कजि सङ्गतं, पशुपति क्षेत्र विकास कोषया गुरुयोजना कार्यान्वयनयात ग्वाहालि याःगु परिवार सरकारपाखें हे पीडित जूगुलिं थुकियात भिंकेत नेपाल सरकारलिसे माग यानादिल। सुकुमवासीया व्यवस्थापनया विषयय् व थ्वसिबे न्ह्यःया समस्या ज्यंकेगु विषयय् नेपाल सरकार व येँमपाया मंकाः पुचलं अध्ययनया ज्या यानाच्वंगु धासें प्रमुख प्रशासकीय अधिकृत सरोज गुरागाईंं पुचःयात ब्यूगु १५ न्हुया ई लिपा वइगु प्रतिवेदनं अप्वः धयाथें समस्या ज्यंकेगु लँपुइ वनीगु अपेक्षा यानादिल।

विपद् व्यवस्थापन समितिया कजि प्रेम थापां, सामाखुशी खुसि सिथय्या मापदण्ड कार्यान्वयनया झ्वलय् निजी सम्पत्ति सतकयात ब्यूपिं परिवारयात क्षतिपूर्ति बिइमाःगु प्रस्ताव ल्ह्वनादीगु खः।

Categorized in राष्ट्रिय