अफगानिस्तानया तालिबान सरकारं पाकिस्तानं अफगान हवाई क्षेत्र हाचां गायाः याःगु लिपांगु हवाई आक्रमणय् लानाः म्होतिं १३ म्ह सर्वसाधारण सीगु व १४ म्ह घाःपाः जूगु धाःगु दु।

तालिबानया कथं आक्रमणं निगू देय् दथुया तनावयात थप तच्वयेकूगु दु व सीमावर्ती लागाय् असुरक्षाया अवस्था गम्भीर जूवंगु दु।तालिबानया प्रवक्ता जबिहुल्लाह मुजाहिदं मङ्गलबाः बहनि व बुधबाः सुथय्या दथुइ पाकिस्तानं कुनार, खोस्त व पक्तिया प्रान्तया बस्तीतय्त तातुना बमबारी याःगु धयादिल। वय्कःया कथं उगु आक्रमणय् ११ म्ह मस्त, छम्ह मिसा व छम्ह ज्याथः सीगु दु।मुजाहिदं आक्रमणय् लानाः १४ म्ह मिसापिं घाःपाः जूगु जानकारी बिसें घटना लिपाया किपा नापं सार्वजनिक यानादिल।

तालिबानं थुकियात अफगानिस्तानया सार्वभौमसत्ताया प्रत्यक्ष उल्लङ्घन व नागरिकपिंत याःगु आक्रमणया कथं व्याख्या याःगु द। अफगान अधिकारीतय् कथं लिपांगु दच्छि थुखे अफगान भूमिइ जूगु पाकिस्तानी सैन्य कारबाहीया हुनिं सलंसःम्ह मनूत सी धुंकूगु दु। सीमापार तनाव तच्वःया वंगुलिं निगू देय् दथुया स्वापू मदिक्क स्यनाः वंगु धाःगु दु। मार्चय् जूगु छगू तःधंगु आक्रमणय् पाकिस्तानी सेनां काबुलया पुनर्वास केन्द्रयात निशाना दयेकूगु दाबी याःगु दु । तालिबानया कथं उगु घटनाय् म्होतिं २६९ म्ह सीगु खः। उकिया लिपा सीमावर्ती लागाय्् थितुंथिक सैन्य कारबाही जुया च्वंगु दु।

अक्टोबर २०२५ य् इस्लामाबादं राजधानी काबुल लिसें अफगानिस्तानया थीथी थासय् तःधंगु हवाई आक्रमण याये धुंकाः निगू देय् दथुया ताःई न्ह्यवं निसेंया तनाव खुला सीमापार द्वन्द्वपाखे ब्वलनावंगु विश्लेषण याःगु दु। मदिक्कं जुया च्वंगु आक्रमण व झडपया हुनिं द्वलंद्वः अफगान नागरिक विस्थापित जूगु दुसा तःल्याखं मनूपिंसं थःगु छेँ व थाय् बाय् त्वःतेमाःगु दु। तालिबानं पाकिस्तानयात थःगु आन्तरिक सुरक्षा हाथ्यायात लिधंसा दयेकाः अफगान लागाय् थितुंथिक सैन्य हस्तक्षेप यानाच्वंगु द्वपं बियाच्वंगु दु। पाकिस्तानं धाःसा तहरीक–ए–तालिबान पाकिस्तान (टिटिपी) व बलुचिस्तान लिबरेसन आर्मी (बिएलए) थें जाःगु पुचःयात अफगान भूमि पाखें ग्वाहालि जुया च्वंगु धायेगु यानाच्वंगु दु। इस्लामाबादं तालिबानयात उगु पुचःयात बाय् बिइगु याना च्वंगु द्वपं बिइगु यानाच्वंगु जूसां तालिबानं थुकियात अस्वीकार यानाः वयाच्वंगु दु।

तालिबानया धापू कथं पाकिस्तानं थःगु सुरक्षा कमजोरीया जिम्मेवारीत पाखें तापानाः च्वनेत अप्रमाणित द्वपं बिइगु यानाच्वंगु दु। विश्लेषकपाखे सन् २०२१ य् तालिबान हाकनं सत्ताय् लिहांवये धुंकाः न्हापा अपेक्षा यानातःगु सत्तिगु स्वापू स्यनाः वंगु खः। दँब दँतक तालिबानया छगू प्रमुख समर्थक मध्ये तायेकातःगु पाकिस्तान व अफगानिस्तान दथुइ आः अविश्वास तच्वया वंगु दु । लिपांगु घटनातय्सं निगू जःला खःला देय् दथुया स्वापू थप जटिल व तनावपूर्ण जुया वंगु छुमां क्यंगु दु। 

Categorized in अन्तर्राष्ट्रिय