संकिपाया पेसाकःमियात समुदायलिसे स्वाइगु व समुदायया पाखें हनेगु ज्याझ्वः कथं येँ महानगरपालिकां ‘त्वाः त्वालय् संकिपा महोत्सव’ याइगु जूगु दु।

सम्पदा लिसें पर्यटन समितिया कजि आशामान सङ्गतं ‘त्वाः त्वालय् संकिपा महोत्सव’ ज्याझ्वलं संकिपा ख्यःया फुक्क विधायात समुदायलिसे स्वाइगु धयादिल। यँेमनपाया सम्पदा लिसें पर्यटन विभागं कार्यान्वयनय् हयेत्यंगु ‘त्वाः त्वालय् संकिपा महोत्सव’ ज्याझ्वःया अपेक्षित लिच्वःया विषय खँ ल्हानादिसें वय्कलं संकिपा ख्यःयात सम्मानित पेसाया कथं समुदायय् म्हसिका दयेकाबीमा धयादिल।

समुदाय स्तरय् संकिपा महोत्सवया ज्याझ्वः सञ्चालन व्यवस्थापन यायेत येँमनपां सामाजिक लिसें सांस्कृतिक ज्याखँय् आबद्ध गैरनाफामूलक सङ्घ संस्था, युथ क्लब, सामुदायिक संस्था, टोल विकास समिति, सांस्कृतिक समूह, पुचःयात जिम्मेवारी बिइगु निर्णय याःगु दु। संकिपा ब्वज्या जुइगु थाय्त परम्परागत त्वाः, वहाः, वही, चुकः, ननी, एम्पीथिएटर, पार्क थें जाःगु चकंगु थाय् जुइगु दु।

थुकिया निंतिं येँमपां खुला प्रस्ताव आह्वान याःगु दु। जेठ २७ गते बहनिसिया १२ः०० ताः ई न्ह्यः मं दूपिंसं येँमनपाया वेबसाइटय् बियातःगु थाय् बाय् प्रस्ताव बिइ फइगु दु। समुदायस्तरया ज्याझ्वः जूगुलिं व्यवस्थापनय् मंकाःज्या याये मःदूगु सङ्घसंस्थायात प्रस्ताव न्ह्यब्वयेत विभागया प्रमुख कुमारी राईं इनाप यानादिल।

संकिपाया गुणस्तर, विषयवस्तु, प्रस्तुतिकरण थेंजाःगु विषय ल्ययेत, ज्याझ्वःयात आज्जुकथंया दयेकेगु निंतिं निगरानी, नियमन लिसें नियन्त्रण यायेत सङ्गतया संयोजकत्वय् समिति नीस्वंगु दु। 

Categorized in मनोरन्जन