सम्पादक समाज नेपालया ग्वसालय् व नेपाल रेडक्रस सोसाइटी येँ जिल्ला शाखाया प्राविधिक ग्वाहालिइ फोटो पत्रकारतय्गु निंतिं ग्वसाः ग्वःगु निन्हुया प्राथमिक उपचार (फस्र्ट एड) तालिम क्वचाल।

गोविन्द वियोगी पत्रकारिता अध्ययन केन्द्र, सुइरेचौरस्थित सम्पादक समाज नेपालया छेँय् न्ह्याःगु तालिमय् थीथी सञ्चार माध्यमय् ज्या यानाच्वंपिं झिम्ह पत्रकारपिसं ब्वति काःगु खः। तालिम क्वचायेकूगु ज्याझ्वलय् शिवपुरी गाउँपालिकाया अध्यक्ष गोविन्द थपलिया, नेपाल रेडक्रक सोसाइटी येँ जिल्ला शाखाया सभापति श्यामकाजी डोटेल, सम्पादक समाज नेपालया उपाध्यक्ष जुनारबाबु बस्नेत, रेडक्रस जिल्ला शाखाया दुजः नवराज काफ्ले व समाजया संरक्षण किरण वैद्यं ज्याझ्वलय् ब्वति काःपिंत प्रमाणपत्र लःल्हाःगु खः।

तालिमय् दुर्घटना, विपद् व आपत्कालीन अवस्थाय् माःगु प्राथमिक उपचारया आधारभूत सीप, घाःपाः जूपिंत उद्धार, रक्तस्राव नियन्त्रण, हाडजोर्नी लिसे घाःपाःया व्यवस्थापन विषयस प्रशिक्षण बीगु खः।ज्याझ्वलय् न्ववायेगु झ्वलय् सम्पादक समाज नेपालया महासचिव श्यामकाजी डोटेलं फोटो पत्रकारत अप्वः यानाः सभा, जुलुस, आन्दोलन, विपद् व मेगु जोखिमपूर्ण घटनास्थलय् न्ह्यःने खने जुइपिं जुयाः उमिगु सुरक्षायात ध्यानय् तयाः तालिमया ग्वसाः ग्वयागु खँ धयादिल।वय्कलं फिल्डय् ज्या याइपिं पत्रकार वा उमि सहकर्मी घाःपाः जूगु अवस्थाय् तत्काल प्राथमिक उपचार यायेगु क्षमता विकास यायेगु तालिमया मू आज्जु जुइगु खँ धयादिल।

प्रशिक्षण लिपा ब्वतिकाःपिंपाखे न्ववासें फोटो पत्रकार शम्भु दंगालं वर्तमान परिवेशय् फोटो पत्रकारतय्त फस्र्ट एड तालिम तसकं सान्दर्भिक व आवश्यकता जूगु खँ धयादिल।

Categorized in राष्ट्रिय