अमेरिका, मेक्सिको व क्यानाडाय् जुइगु विश्वकपया लेखाजोखा
प्रजित शाक्य | अनलागा एकादशी ११४६, जेष्ठ २८ बिहीवाः
विश्वकप फुटबल धधेंबल्ला बिहिबाःनिसेँ अमेरिका, मेक्सिको व क्यानाडाय् जुइत्यंगु दु । प्यदँय् छक्व जुइगु विश्वकप फुटबल हलिंया सकस्यां लँ स्वयाच्वंगु खः। छाय्धाःसां विश्वकप फुटबल हलिंया दक्कलय् लोकंह्वागु धेधेंबल्ला खः। न्हापाखुशी स्वंगू देशय् जुइत्यंगु थ्व विश्वकप भचा पाः। न्हापा निगू देय् जक मिलेजुयाः विश्वकप ग्वसाः ग्वःगु इतिहास दु। सन् २००२ य् दक्षिण कोरिया व जापानय् मिलेजुयाः विश्वकप ग्वसाः ग्वःगु खः।
थुगुसीया विश्वकपया मेगु विशेषत धैगु ४८ देय्या सहभागिता खः। फिफां थुगुसी १२ देय्यात थपे यानाः विश्वकपया बिस्तार याःगु खः। यक्व पुचलं ब्वति काइगु जूगुलिइ कासाया ल्याः नं अप्वः जुइगु हे जुल। थुगुसी विश्वकपय् जम्मा १०४ कासा म्हितिगु तालिका दु। उकिनं अमेरिकां ७६ कासाया ग्वसाः ग्वइ। क्वाटरफाइनल, सेमिफाइनल व फाइनल नं अमेरिकाय् जुइ।
अमेरिकाया ११ शहर न्यूयोर्क, बोस्टन, मियामी, फिलाडेल्फिया, एट्लान्टा, डालास, हस्टन, कानास, लस एन्जल्स, सान फ्रान्सिस्को व सियाटलं विश्वकप रंगशालाय् विश्वकप जुइत्यंगु दु। अथेहे मेक्सिकोया स्वंगू शहर मेक्सिको सिटी, मोन्टरेरी व गुवाडालाजाराय् जम्मा १३ कासा म्हिती। क्यानाडाया टोरन्टो र भानकुभर शहरय् यानाः १३ कासा जुइ।
मेक्सिको व अमेरिकां न्हापा नं विश्वकप फुटबल ग्वसाः ग्वये धुंकल। मेक्सिकों सन् १९७० व १९८६ अले अमेरिकां सन् १९९४ य् विश्वकप ग्वसाः ग्वःगु खः। क्यानाडां धाःसा न्हापाखुशी विश्वकप ग्वसाः ग्वयेत्यंगु खः । थुगुसी हलिंया मुक्कं जनसंख्य मध्ये ५८ प्रतिशत विश्वकप लिसे स्वाइगु अनमान यानातःगु दु।
विश्वकपमा उलेज्या जुन ११ तारिखय् मेक्सिकोया ’एस्टाडियो एज्तेका’ रंशालाय् जुइ। उलेज्या ज्याझ्वलय् ग्वसाः खलः मेक्सिको व दक्षिण अफ्रिकाया दथुइ प्रतिस्पर्धा जुइगु तालिका दु। विश्वकपया यात्रा न्ह्याःगु वा न्हायेधुंकाः जुलाई १९ तारिखय् अमेरिकाया शहर न्यू जर्सीया मेटलाइफ रंगशालाय् फाइनल जुइ। फाइनलया समापनय् अमेरिकाया राष्ट्रपति डोनाल्ड ट्रम्प व फिफाया अध्यक्ष जियानी इनफान्टिनोया ल्हातं च्याम्पियन देय्यात विश्वकप ट्रफी लःल्हाइगु ज्याझ्वः जुइ।
विश्वकपया थ्व नीस्वंगु संस्करण खः। थ्व यात्राय् ब्राजिलं दक्कलय् अप्व न्याकः च्याम्पियन जूगु दु। जर्मनी व इटालीं प्यकः–प्यकः विश्वकप त्याके धुंकल । विश्वकपय् थीथी इलय् इतिहास दयेकूम्ह इटाली धाःसा थुगुसी नं चयन मजुल। इटालीं विश्वकप म्हितेमखंगु थ्व लगातार स्वंगू संस्करण खः। अर्जेन्टिनां स्वक्व ट्रफी ल्वने धुकंल। अर्जेन्टिनाया थुगुसीया अभियान उपाधि रक्षा यायेगु खः। फ्रान्सं व उरुग्वें निक्व–निक्व अले इङगल्यान्ड व स्पेनं छकः, छकः विश्वकप त्याकूगु दु। थुगुसी नं विश्वकप च्याम्पियनया दावेदारय् स्पेन, फ्रान्स, अर्जेन्टिना, इङगल्यान्ड, ब्राजिल, पोर्चुगलयात कयातःगु दु। अथेहे नेदरल्यान्ड्स, बेल्जियम थेंज्यापिनिगु सम्भावनायात नं दुमथ्यकाल धाःसा गलत जुइ।
थुगुसीया विश्वकपय् म्हितिपिनिगु देय्या ल्याः अप्व जूगुलिं न्हापाखुशी विश्वकप म्हितिपिनिगु ल्याः नं अप्वः जूगु दु । थुगुसी जक प्यंगु देय् नं विश्वकपय् पदार्पण यायेत्यंगु दु । विश्वकपय् न्हापाखुशी म्हितिपिं भाग्यमानी देय् अफ्रिकाया केपभेर्डे, क्यारबियन देय् कुराकाओ, एसियाया जोर्डन व उज्बेकिस्तान खः ।
विश्वकप धैगु इतिहासय् थःगु नां च्वयेगु ह्वःताः नं खः । उकिंयानाः कासामितय्सं विश्वकपय् लिपा तक लुमंकेबहः जुइगु क्यने ज्या यानाः चर्चित जुइगु कुत याइ । विश्वकप २०२६ य् नांजाःपिं फुटबलरतय्सं इतिहासय् थःगु नां च्वकेत भरमग्दुर कुतः याइगु आशा यायेफइ। थुगुसिया विश्वकपय् झिम्ह सुपरस्टार फुटबलरपाखेँ आशा अपेक्षा दु ।
अर्जेन्टियानाया लियोनेल मेसी, पोर्चुगलया क्रिस्टियानो रोनाल्डो, फ्रान्सया किलियन एमबापे व उस्मान डेम्बेले, नर्वेया इर्लिङ हालान्ड, स्पेनका लामिने यमाल, ब्राजिलया नेमार, इजिप्टया मोहम्मद सलाह, इङगल्यानडका युड बेलिङघम व अमेरिकाया क्रिस्टियन पुलिसिचपाखेँ छु विशेष क्यनेज्या जुइ धैगु फुटबल प्रेमीतय्गु अपेक्षा दु।
मेसी व रोनाल्डोया ला थ्व खुक्वःगु विश्वकप खः । थ्व विश्वकपया छगू दुर्लभ कीर्तिमान खः । मेसीं सन् २०२२ य् च्याम्पियन जुइगु गौरव हािसल यायेधुंकल । विश्व फुटबलय् मेसी नापं थ्व पुस्ताया सर्वश्रेष्ठ कासामि ४१ वर्षीय रोनाल्डोया निंतिं धाःसा विश्वकप त्याकेगु थ्व अन्तिम ह्वःताः खः । रोनाल्डो अल नासर एफसीयात सउदी लिग च्याम्पियन दयेका विश्वकप म्हितेत्यंगु खः।
अथेहे हरेक विश्वकपय् चोट व चयन मजूगुलिं गुलिखे उत्कृष्ट कासामिपिं विश्वकपं पिने च्वनेत बाध्य जुइ । थ्व क्षण विश्वया उत्कृष्ट कासामितय् निंतिं तसकं पीडादायी खः। थुगुसी नं विश्वकपया नांजाःपिं कासामिपिनिगु हुल जक स्वकुमि जुइ। चोटया हुनिं जक मखु, टिमय् मदुगु व थःगु देय्या निंतिं छनोट मजूगु कारणं नं विश्वकपय् गुलिखे नांजाःपिं कासामि खनेदइ मखु। फ्रान्सया स्ट्राइकर ह्यूगो इकिटिके विश्वकप सुरु जुइगु निला न्ह्यः हे तच्वकं घाःपाः जूगु खः। ब्राजिलया स्टार जोडी रोड्रिगो व एडर मिलिताओ नं विश्वकपं पिने लाःगु दु । थ्व प्यक्वःगु विजेता टिमया निंतिं तःधंगु क्षति खः। जर्मनी व बायर्न म्युनिखया फरवार्ड सर्गी गेब्रियलयात नं विश्वकपय् खनेमदइगु जूगु दु। व प्रशिक्षणय् घाःपाः जूगु खः। अथे हे अर्जेन्टिनाया जोआकिन पानिसेली, इंग्ल्याण्डया बेन ह्वाइट, नेदरल्याण्ड्सया जाभी सिमोन, अमेरिकाया आयोजक क्यामरुन कार्टर–भिकर्स, प्याट्रिक एग्येमाङ, जोन कार्डोसो, स्कटल्याण्डया बिली गिल्मर व स्पेनया फिर्मिनो लोपेज नं घाःपा जुयाः विश्वकपय्ं खनेदइ मखुपिं नांजाःपिं कासामि खः।
अथेहे प्रिमियर लिगया स्टार कासामि कोल पाल्मर, फिल फोडेन, ह्यारी म्यागुइर, ट्रेन्ट अलेक्जेन्डर–अर्नोल्डला इङगल्यानडया टिमय् हे मलात। फ्रान्सेली मिडफिल्डर एडुआर्डो कामाभिङ व डिफेन्डिङ च्याम्पियन अर्जेन्टिनाया पाउलो डायबालां नं प्रशिक्षकया विश्वास त्याके मफुत। थुगुसीया विश्वकपय् स्टार स्ट्राइकर रोबर्ट लेवान्डोव्स्की नं मदइगु जूगु दु। पोल्याण्ड विश्वकपय् छनोट जुइमफुगुलिं लेवान्डोस्कीया कासा स्वयेखनी मखुत। अफ्रिकाया निगू तःधंगु फुटबल राष्ट्र क्यामरुन व नाइजेरिया नं थुगुसी विश्वकपय् छनोट जुइमफुत। थुकिया अर्थ क्यामरुनया ब्राउन म्बुएमा, नाइजेरियाया फरवार्ड भिक्टर ओसिमहेन व एडेमोला लुकम्यान थेंज्याःपिं कासामिपिसं नं थुगु विश्वकपय् कासा स्वये फइमखु।
च्याम्पियन्स लिग विजेता पेरिस सेन्ट जर्मेन व लिभरपुलया निंतिं लगातार प्रभावशाली म्हिताच्वंम्ह क्वारा क्वित्स्खालिया व डोमिनिक शोबोस्लो नं अमेरिका, मेक्सिको व क्यानाडाय् जुइगु कासाय् म्हिते मखनीगु जूगु दु। क्वित्स्खालियाया देय् जर्जिया व शोबोस्लोया देय् हंगेरी नं थुगु विश्वकपय् छनोट जुइमफुत।
