शिक्षा लिसें खेलकुद मन्त्रालयं राष्ट्रिय खेलकुद परिषद् (राखेप) या न्वकू पदय् पूर्वराष्ट्रिय फुटबल टोलीया गोलकिपर विशाल श्रेष्ठयात नियुक्त याःगु दु।

ताः ईतक नेपाली राष्ट्रिय फुटबल टोलीया दुजः जुयादीम्ह श्रेष्ठं थःगु कासा जीवनय् च्वछायेबहःगु योगदान बियादीगु दु। छुं दँ न्ह्यः अन्तरराष्ट्रिय फुटबलपाखें सन्यास कयादीम्ह वय्कः आः नेपाली कासा ख्यःया सर्वोच्च निकाय राखेपया नेतृत्व तगिंमय् थ्यनादीगु दु।

थ्वहे दथुइ मन्त्रालयं थीथी कासा विधाया प्रतिनिधित्व सुनिश्चित यायेगु तातुना प्यम्ह बोर्ड दुजः नापं नियुक्त याःगु दु। नियुक्त जुयादीपिंकय् टेबल टेनिस कासामि सिक्का सुवाल, पूर्व अन्तरराष्ट्रिय क्रिकेट कासामि लिसें प्रशिक्षक शक्ति गौचन, बुद्धिचाल कासामि मोनालिसा खुम्बु लिसें फुटबल कासामि पवन शाही जुयादीगु दु।

मन्त्रालयया थ्व निर्णययात खेलकुद प्रशासनय् अनुभवी कासामिपिनिगु ब्वति अप्वयेकेगु कुतःया कथं स्वयातःगु दु। नवनियुक्त पदाधिकारीपिंसं नेपाली कासाख्यःया विकास, व्यवस्थापन व नीतिगत सुधारय् महत्त्वपूर्ण भूमिका म्हितीगु अपेक्षा यानातःगु दु।

Categorized in कासा