येँ महानगरपालिकाया कार्यवाहक प्रमुख सुनिता डङ्गोलं सतक सुरक्षा व ट्राफिक व्यवस्थापनया ज्या मुक्कं सहर कःघानाः व विकल्प बियाः सुधार यायेत इनाप यानादीगु दु।

बिहीबाः उपत्यका ट्राफिक प्रहरी ज्याकुथिया प्रमुख प्रहरी वरिष्ठ उपरीक्षक सुरेशप्रसाद काफ्लेलिसेया सहलहय् ट्राफिक व्यवस्थापनय् सहरया ख्वाःजक मखु, झट्ट स्वयेबलय् खने मदूगु थासय् गथे यानाः व्यवस्थापन जुयाच्वंगु दु, व नं स्वयाः ज्या यायेमाः धइगु कार्यवाहक प्रमुख डङ्गोलया धारणा खः। कार्यवाहक प्रमुख डङ्गोलं धयादिल, “पीच सतकय् पार्किङ यानातःगु मदु।

थुकिं सहरया ख्वाः बांलाकूगु दु। थ्व बांलाःगु ख्वाः उबलय् चकनी, गबले दुने गल्ली व चुकय् सवारी साधनया चाप व्यवस्थापन जुइ। सवारी चालकं धुक्क जुयाः पार्किङस्थल गुगु खः धकाः सिइकेफइ व उपयोग यायेफइ। छखेया चाप मेथाय् सरे जुइमखु।” येँया ट्राफिक व्यवस्थापनया विषयय् खँ ल्हानादिसें कार्यवाहक प्रमुख डङ्गोलं धयादिल, “पार्किङया सुविधा लिसें विकल्प बियाः व्यवस्थापन याये। ट्राफिक प्रहरी व येँमपा प्रहरी दथुइ लिक्कया सम्बन्ध तयाः दीर्घकालीन ज्या याये। थुकिया निंतिं येँमपां ट्राफिक प्रहरीयात आवश्यक ग्वाहालि उपलब्ध याकी।”

“येँया पूर्वाधारलिसे सवारी चालकतय्गु मनोविज्ञान स्वानाच्वंगु दु”, ट्राफिक प्रहरी ज्याकुथिया प्रमुख काफ्लें धयादिल, “सतकय् खिपः तानातःगु दु धाःसा, कोन तयातःगु दु धाःसा जक ट्राफिक नियमया पालना यायेगु, थुजाःगु पूर्वाधार तयामतःगु थासय् यःयत्थे यायेगु चलन दु। पूर्वाधारलिसे सम्बन्धित थ्व मनोविज्ञान सुधारय् ज्या यायेमाःगु दु।”

चालकतय्गु अनुशासनया खँ ल्हानादिसें वय्कलं धयादिल, “वंगु प्यन्हुं विद्यालयया गाडी चले याइपिं १६ म्ह चालकं सुथय् हे मादक पदार्थ सेवन यानातःगु लुयावल, थ्व छगू विम्ब खः, झीसं सुधार यायेमाःगु यक्व थाय् दु।”असार ज्वःछि सचेतनामूलक ज्याझ्वः सञ्चालन यानाः सतक सुरक्षा व नियम पालनाय् जिम्मेवार जुइत इनाप  यायेगु व साउनंनिसें कडा कानुनी कारबाही यायेगु योजना दयेका धकाः काफ्लें कनादिल।

येँया सहरी व्यवस्थापनया विषयमध्ये ट्राफिक व्यवस्थापन प्रमुखमध्ये छगू खः। थुकिया सुधारं नागरिकं सरकारया ज्या महसुस यायेफइ, नापलायेफइ। थ्व तातुना पूवंकेगुकथं ज्या याये । थ्व सहलहया लिच्वः खः। ज्याझ्वलय् येँमपाया प्रमुख प्रशासकीय अधिकृत सरोज गुरागाईँ नं सहभागी जुयादीगु खः।

Categorized in राष्ट्रिय