ट्रेड युनियन खारेज यायेगु निर्णय विरुद्ध लाःगु रिट निवेदनय् सर्वोच्च अदालतं अन्तरिम आदेशयात निरन्तरता बिइत अस्वीकार याःगु दु।

प्रधान न्यायाधीश डा मनोजकुमार शर्मा, न्यायाधीशपिं डा नहकुल सुवेदी, विनोद शर्मा, अब्दुल अजीज मुसलमान व महेश शर्मा पौडेलया संवैधानिक इजलासय् थ्व हे जेठ २० गते सुरु जूगु सुनुवाइ थौं क्वचाये धुंकाः थ्व स्वयां न्ह्यः ब्यूगु अन्तरिम आदेशयात निरन्तरता बिइत अस्वीकार याःगु खः।

अदालतया आदेशलिसें ट्रेड युनियन खारेज यायेगु निर्णय कार्यान्वयन यायेत सरकारयात लँ चाःगु खः।थ्व स्वयां न्ह्यः, वंगु वैशाख २८ गते उबलय्या कायममुकायम प्रधानन्यायाधीश सपना प्रधान मल्ल, न्यायाधीशपिं कुमार रेग्मी, हरिप्रसाद फुयाल, विनोद शर्मा व शारङ्गा सुवेदीया संवैधानिक इजलासय् सुनुवाइ यानाः राय बाझे जुयाः आदेश ब्यूगु खः।

उबलय्या कायममुकायम प्रधानन्यायाधीश मल्ल, न्यायाधीशपिं रेग्मी व फुयालं सरकारया उगु निर्णय कार्यान्वयन मयायेत अल्पकानीन अन्तरिम आदेश बियादीगु खः धाःसा न्यायाधीशपिं विनोद शर्मा व शारङ्गा सुवेदीं धाःसा बिस्कं मत तयाः भिंके मफइगु क्षति जुइ मखूगुलिं अल्पकालीन आदेश बिइगु विषय सहमति मदूगु धयादिल।

अदालतं थ्व विवादय् निगुलिं पक्षयात सहलहया निंतिं सःताः महान्यायाधिवक्ताया ज्याकुथिपाखें लिखित लिसः पेस यायेत धाःगु खः। नेपाल निजामती कर्मचारी सङ्गठन केन्द्रीय कार्य समितिया पाखें अख्तियार दूम्ह नायः भवानी दाहालं तकं राष्ट्रपतिया ज्याकुथियात विपक्षी यानाः ट्रेड युनियन खारेज यायेगु निर्णय कार्यान्वयन मयायेत आदेशया माग याःगु खः।

Categorized in राष्ट्रिय