चलचित्र विधापाखें येँ महानगरपालिका व सङ्गीत विधापाखें यल महानगरपालिका युनेस्कोया रचनात्मक सहर सञ्जालय् दुजः जूगु दु।

स्वनिगःया स्थानीय तहमध्ये येँ महानगरपालिका चलचित्र विधापाखें व यल महानगरपालिका सङ्गीत विधापाखें युनेस्कोया रचनात्मक सहर सञ्जालय् दुजः जुइ धुंकाः स्थानीय तहलिसें युनेस्को, ब्रिटिस काउन्सिल, एफसीए, आइएलओलिसें निकाय नापं ज्याकुथि व रचनात्मक ख्यःलिसे आवद्ध मनूतय्सं मंकाः कुतः न्ह्याकूगु खः।

रचनात्मक उद्योगया विकास व विस्तारया निंतिं कल्रल एण्ड क्रिएटिभ इन्डष्ट्रिज फ्रेन्डस ग्रुप (फर सिसीआई) निर्माण यानाः थवंथः अभ्यास, ज्ञान, सीप अनुभव कालबिल न्ह्याकाहःगु येँमपाया कार्यवाहक नगरप्रमुख सुनिता डङ्गोलं जानकारी बियादिल। थुकिया न्हापांगु बैठक यल महानगरपालिकां ग्वसाःग्वःगु खः। येँ महानगरपालिकाया कार्यवाहक प्रमुख डङ्गोलया अध्यक्षताय् निक्वःगु बैठक क्वचाःगु खः।

बैठकय् थःम्हं चयन यानागु विधा व थ्व अन्तर्गत पूवंगु ज्याया विषयय् जानकारी बिइगु झ्वलय् येँमपाया कार्यवाहक प्रमुख डङ्गोलं चलचित्र विधां रचनात्मक उद्योगया मेगु विधायात चलचित्रपाखें कःघायेफइगु व समुदायस्तरय् रचनात्मक अर्थतन्त्रयात न्ह्याकायंके फइगु जूगुलिं येँ महानगरपालिकां चलचित्र विधा चयन याःगु धयादिल। वय्कःया कथं येँया समुदायदुने सुलाच्वंगु बाखंपाखें पात्रलिसे स्वायेफइगु, येँयात खुला स्टुडियो कथं विकास यायेफइ।

“सार्वजनिक स्थलय् सामाजिक, सांस्कृतिक नापं पारिवारिक विषय आधारित चलचित्र प्रदर्शन यानाः समुदाययात थुकिइ रुचि दयेकेगु, चलचित्र संवाद यायेगु, शिक्षा, सूचना व सन्देशया विषय स्वायेगु थुकिया मुख्य ज्याखँत खः”, प्रमुख डङ्गोलं धयादिल, “थुकिं चलचित्रय् निर्माता, निर्देशक, कथाकारलिसे समुदायया सम्बन्ध स्थापित यानाः उत्पादनस्थल उपलब्ध याकेगु व समुदायय् आय वृद्धि याकेगु व जनहितकथं लिच्वः हयेगु खः। समुदायय् दूगु तर आयआर्जन जुइ मफयाच्वंगु थाय्यात आयलिसे स्वानाः लिसें थ्वलिसे सम्बन्धित कर प्रणालीयात सहज यानाः सहजीकरणया ज्या यानाच्वनागु दु”, वय्कलं धयादिल।

यल महानगरपालिकाया प्रमुख चिरीबाबु महर्जनं महानगरं सङ्गीत विधापाखें युनेस्को क्रिएटिभ सिटीज नेटवर्कय् सदस्यता ताःलाकूगु कनादिसें थुकियात समुदायस्तरय् अभ्यास अप्वयेकेगु लिसें अन्तरराष्ट्रियस्तरय् म्हसीकेगु ज्यालिसे सम्बन्धित प्राथमिक योजना दूगु धयादिल। रचनात्मक अर्थतन्त्र, दिगो विकासया प्रवद्र्धन, रोजगारी सृजना, अन्तर सम्बन्ध विकास, ग्वाहालि व साझेदारी विस्तारया निंतिं स्थानीय सरकार व अन्तरराष्ट्रिय संस्थातय्गु मंकाः दबू कथं थ्व पुचःयात न्ह्याकायंकेत्यंगु वय्कःया धापू खः।

Categorized in राष्ट्रिय