सम्पदा संरक्षणय् ज्या यानाच्वपि पत्रकारपिन्त सम्मान यलय् सांस्कृतिक पहिचान प्रवद्र्धन यायेगु निति सञ्चारमाध्यमपाखे भूमिका म्हिताच्वपि न्ह्यय्म्ह पत्रकार तय्त यल महानगरपालिका– ५ वडा कार्यालयं न्हापागु पटक सुशासन पत्रकारिता सम्मान– २०८३ पाखे हंगु दु।

नेपालभाषाया रंगीन वाःपौ लहनाया प्रधान सम्पादक नृपेन्द्रलाल श्रेष्ठ, नेपाल समाचारपत्रया सहायक सम्पादक सुनील महर्जन, श्याम स्मृत, सुविनकुमार श्रेष्ठ, विश्वन्तर शाक्य, सनीराज शाक्य व रामराजा बज्राचार्ययात थौ छगु ज्याझ्वः दथुइ हनेज्या याःगु खः। यल महानगरपालिका – ५ वडा कार्यालयं छगु तधःगु ज्याझ्वः दथुइ यल महानगरपालिकाया मेयर चिरिबाबु महर्जनं हनापौ व उपमेयर मञ्जली शाक्यं स्वामा क्वखाय्कादीगु खः।

पत्रकारितापाखे कला, संस्कृति, सम्पदाया संरक्षण व सम्बद्र्धन नाप वडां याःगु पूर्वाधार नाप सामाजिक विकास लिसे बालागु कुतः व सुशासनय् प्रवद्र्धन यायेगुलि योगदान यागुलि हनापौ लःल्हानागु खः धका उल्लेख यानातगु दु। अथेहे सञ्चारकर्मी हर्कबहादुर श्रेष्ठ, सुदर्शन महर्जन व सुनीता विश्वकर्मायात न कदर पौ लःल्हागु खः।वडां थथे दकलय् न्हापागु पटक लःल्हागु खः धका वडाअध्यक्ष विकासमान श्रेष्ठं धयादीगु खः।

सञ्चारमाध्यमय् वःगु सकारात्मक बुखँ व आलोचना टिप्पणी निगुलि बुखँयात आत्मसातयासे थज्यागु ज्या मदिक्क यानाच्वपि पत्रकार तयेस थःगु पत्रकारितापाखे भूमिका म्हितुगुलि वयकःपिनिगु सम्मान जुइगु कथं थौ ज्याझ्वः याना धका वडाअध्यक्ष श्रेष्ठं धयादीगु खः।

उगु ज्याझ्वलय् नेपाःया परम्परागत ख्वाःपा प्याखँया अनुसन्धानय् जीवन समर्पित यानादीम्ह वीणा जोशी (राजभण्डारी) यात यल गौरवपाखे सम्मान पौ नाप नगद राशि २५ हजार लःल्हागु खः। अथेहे बडीबिल्डर राष्ट्रिय व अन्तर्राष्ट्रिय कथं म्हसिउम्ह कासामि उर्मिला श्रेष्ठयात नगद राशि २५ हजार नाप यल विशेष सम्मान लःल्हागु खः।

किपा सतिश शाक्य Categorized in राष्ट्रिय