विरोध संयुक्त राज्य अमेरिकालिसे सम्भावित शान्ति सम्झौताया चर्चा तच्वयाच्वंगु इलय् इरान दुने उकिया विरोध नापं तच्वया वःगु दु।

उत्तरपूर्वी सहर मशहदय् विदेश मन्त्रालयया ज्याकुथि पिने तःल्याखय् प्रदर्शनकारीतय्सं सम्भावित सम्झौताविरुद्ध नाराबाजी यासें शीर्ष कूटनीतिज्ञ अब्बास अराघचीया राजीनामा माग याःगु दु। इरानी समाचार संस्था फार्सं सार्वजनिक याःगु भिडियोय् हाकुगु वसः पुनातःपिं मिसापिंलिसेंया प्रदर्शनकारीत ह्याउँगु व हाकुगु ध्वाँय् ज्वनाः विदेश मन्त्रालयया ज्याकुथि न्ह्यने मुनाच्वंगु खनेद।

उमिसं ‘अराघची, राजीनामा ब्यु’ व ‘घुसपेठीत मूर्दावाद’ थें जाःगु नारा थ्वयेका च्वंगु दु। प्रदर्शनया पृष्ठभूमिइ विदेशमन्त्री अराघचीं नकतिनि जक राज्य टेलिभिजनय् ब्यूगु अन्तर्वार्ता दूगु धयातःगु दु। उगु अन्तर्वार्ताय् वय्कलं सम्भावित अमेरिका–इरान सम्झौताया छुं पक्षबारे छुंमा बियादीगु खः, गुकिं देय्दुनेया राजनीतिक बहसयात झं तच्वयेकूगु खः। सम्झौताया विरोधीतय् कथं प्रस्तावित व्यवस्था इरानया रणनीतिक हित अःखः जुइफु।

थुकिं हर्मुज जलघाँटीइ तेहरानया प्रभाव कमजोर याइगु दु व वार्ताकारतय्सं अप्वः छुट ब्यूगु दु धइगु उमिगु धापू दु। थ्व असन्तुष्टि विशेष यानाः राज्य टेलिभिजन पाखें सम्भावित सम्झौताय् इरानी बन्दरगाहय् अमेरिकी नौसैनिक नाकाबन्दी चिइकेगु व्यवस्था दुथ्यायेफइगु धकाः जानकारी सार्वजनिक जुइधुंकाः अप्वःगु धयातःगु दु। अमेरिका व इरानदथुइ हर्मुज जलघाँटीया नियन्त्रण ताः ई न्ह्यः निसें विवादया केन्द्रय् लानाः वयाच्वंगु दु।

अराघचीं अन्तर्वार्ताय् ‘हर्मुज जलघाँटीया प्रशासन आः न्हापा थें जुइगु मदु’ धासें उगु जलमार्ग इरानया ‘प्रतिरोधया मू साधन’ मध्ये छगू जूगु धयादीगु खः। थ्वहे दथुइ सामाजिक सञ्जालय् प्रसारित अप्रमाणित भिडियोतय्सं तेहरानय् च्वंगु विदेश मन्त्रालयया मुख्यालय पिने नापं अजाःगु हे प्रदर्शन जूगु दाबी याःगु दु। उगु भिडियोय् प्रदर्शनकारीतय्सं विदेशमन्त्री अराघची व संसदया नायः मोहम्मद बाघेर गालिबफया राजीनामा माग यासें नाराबाजी याःगु खनेदूगु दु।

गालिबफ वार्ता प्रक्रियाय् नापं स्वाःगु धयातःगु दु। मेखे अमेरिकी राष्ट्रपति डोनाल्ड ट्रम्प लिसें पाकिस्तानी अधिकारीतय्सं सम्झौता याकनं लिपांगु रुप काये फइगु धाःगु दु। इस्लामाबादं आइतबाः हे विद्युतीय ल्हाःचिं पाखें सम्झौता जुइफइगु छुंमा क्यंगु दु। अथे खःसां तेहरानं धाःसा ईयात कयाः सावधानी छ्यलाच्वंगु दु। इरानी विदेश मन्त्रालयया प्रवक्ता इस्माइल बाघाईं सम्झौता याकनं जुइगु दाबीयात म्हो महत्व बिसें ‘थ्व कन्हय्पाखे मजुइगु’ धयादिल।

अथे खःसां वय्कलं कन्हय्या दिनय् सम्झौता औपचारिक रूप कायेफइगु ह्वःताःयात अस्वीकार यानादीगु मदु।

Categorized in अन्तर्राष्ट्रिय