सर्वोच्च अदालतं अव्यवस्थित सतकपेटी, धः, सार्वजनिक संरचनाया हुनिं मनूतय्सं फयेमाःगु क्षतिया क्षतिपूर्ति बिइकेत आदेश ब्यूगु दु।

न्यायाधीश हरिप्रसाद फुयाँल व नृपध्वज निरौलाया मंकाः इजलासं २०८१ मङ्सिर १७ गते याःगु फैसलाया नकतिनि जक सार्वजनिक जूगु पूर्णपाठय् सार्वजनिक संरचनाया हुनिं मनूतय्सं क्षति फयेमाःसा क्षतिपूर्ति बिइकेत धाःगु दु। अधिवक्ता सुधिज्ञ पन्तं गृह मन्त्रालय, भौतिक पूर्वाधार लिसें यातायात मन्त्रालय, सहरी विकास मन्त्रालय व येँ महानगरपालिकायात विपक्षी दयेकाः दायर यानादीगु रिट निवेदनय् सार्वजनिक संरचना व उकिया व्यवस्थापनय् जुइगु लापरबाहीया हुनिं नागरिकं नोक्सान फयेमाःगुलिं उकिया क्षतिपूर्तिया व्यवस्था (दुष्कृतिसम्बन्धी कानुन कार्यान्वयन) जुइमाःगु माग यानातःगु खः।

पूर्णपाठय् धयातःगु दु, “सतकपेटीइ प्रहरी पोष्ट दयेकातःगु हकय् प्रत्यर्थी गृह मन्त्रालयं व थःगु मातहत लाःगु निकाय पाखें सतकपेटी अतिक्रमण जुइगु मेमेगु छुं नं कथंया ज्या यानातःगु जूसा प्रत्यर्थी नेपाल सरकार, गृह मन्त्रालय, भौतिक पूर्वाधार लिसें यातायात मन्त्रालय, सहरी विकास मन्त्रालय व येँ महानगरपालिकां माःगु  निर्देशन जारी यानाः अजाःगु अतिक्रमण चिइकि।” अथे हे, अदालतं निर्माण सामग्री, प्लाटफर्म, स्वाहाने बाय् मेमेगु छुं नं कथंया सामग्री तयाः बाय् संरचना निर्माण यानाः निजी व्यक्ति, कम्पनी लिसें गैरसरकारी संस्था पाखें सतकपेटी अतिक्रमण यानातःगु थासय् उगु अतिक्रमण चिइकेत येँ महानगरपालिकायात धाःगु दु।

“मन्त्रालयं थःथवंय् समन्वय यानाः सतकपेटीइ दूगु अतिक्रमण चिइकेत सार्वजनिक सुचं जारी यानाः माःगु कथं ई क्वःछिनाः निर्देशन ब्यू”, पूर्णपाठय् धयातःगु दु, “सुचं कथं सतकपेटीइ जूगु अतिक्रमण मचिइकूसा माःगु पलाः न्ह्याकाः अजाःगु अतिक्रमण चिइकेत समन्वय लिसें कारबाही याः याकी।” अदालतं थःगु अधिकार क्षेत्र अन्तर्गत लाःगु सतकय् सडकपेटी स्यनाः धः चालाच्वंगु जूसां उगु थाय्या रेखदेख, सम्भार यानाः भविष्यय् धलय् कुतुं वनाः सुनां प्राण त्याग यायेगु बाय् जिउ धनया क्षति फये मालीगु अवस्थाया न्यूनीकरण लिसें निवारण यायेगुपाखे सम्बन्धित सकलें सङ्घीय इकाइ लिसें मातहतय् लाइगु निकायं माःगु निर्देशन बियाः फुक्क ज्या याकी धाःगु दु।

लिसें, सतकपेटीइ दूगु अतिक्रमण चिइकेगु लिसें सतकपेटी व्यवस्थापनया सम्बन्धय् कार्यक्षेत्रया दुविधा ब्वलंगु जूसा सहकारिता, सहअस्तित्व लिसें थःथवंय् ग्वाहालिया लिधंसाय् थःथवंय् समन्वय नापं यायेगु धकाः अदालतं धाःगु दु।

Categorized in राष्ट्रिय