संयुक्त राष्ट्रसङ्घया महासभाया अध्यक्ष एनालेना बारबकं सोमबाः संयुक्त राज्य अमेरिका व इरान दथुइ जूगु सम्झौताया घोषणायात लसकुस यानादीगु दु।

संयुक्त राज्य अमेरिका व इरानं ताः ई न्ह्यः निसेंया युद्ध लिपा समझदारीइ वयाः याःगु सहमती घोषणायात महासभाया अध्यक्ष व महासचिवं लसकुसयासें विज्ञप्ति जारी यानागु धयातःगु दु। निगू देय् दथुया युद्धया हुनिं द्वलंद्वःम्ह नागरिकपिं सीगु, नागरिक पूर्वाधारया विनाश, स्ट्रेट अफ होर्मुजय् अवरोध, क्षेत्रिय अस्थिरता व हलिंन्यंकं आर्थिक थतक्वत हःगु खःसा थुगु समझदारी लिसें युद्ध अन्त्य जुयाः दिगो शान्ति न्यंनीगु अपेक्षा यानातःगु दु।

समझदारीया निंतिं मध्यस्थकर्तापिंत सुभाय् देछानादिसें वय्कलं लेबनान लिसें सकलें पक्षतय्त थत्थें व स्थायी युद्धविरामया पूवंकं पालना यायेत व संयुक्त राष्ट्रया बडापत्र व अन्तर्राष्ट्रिय कानून कथं फुक्क विवादतय्गु कूटनीतिक समाधान मालेत थ्व ह्वःताःयात छ्यलेत आह्वान यानादीगु दु।

मध्यपूर्वय् स्थायी शान्ति हयेगु, थुगु क्षेत्रया सकलें देय् व जनताया सुरक्षा सुनिश्चित यानाः निर्दोष नागरिकपिनिगु पीडा अन्त्य यायेगु थ्व छगू जक तरिका जूगु विज्ञप्तिइ न्ह्यथनातःगु दु।

Categorized in अन्तर्राष्ट्रिय