शान्ति पदयात्राया झ्वलय् नेपाल झायादीपिं भियतनामी भिक्षुया पुचलं विश्व सम्पदा धलखय् दुथ्याःगु बौद्ध, स्वयम्भू, चारुमती चैत्य लिसें बिहारलिसें सम्पदाया अवलोकन याःगु दु। पदयात्रापाखें विश्वन्यंकं शान्तिया सन्देश प्रसारण यायेधंकाः भिक्षु रत्नगुणाया पुचः सोमबाः बुद्धया जन्मभूमि नेपाः झायादीगु खः।

वय्कः भियतनामी थेराबाद बौद्ध सङ्घया संस्थापक लिसें प्रथम सङ्घराज भन्ते वमसरखिता महाथेरोझया छम्हजक जीवित शिष्य खः धाःसा भिक्षु पन्नाकाराया गुरु नं खः। वय्कःया हे निर्देशनय् २४ म्ह भिक्षुं १०८ न्हुतक अमेरिकाया थी थी राज्यय् यानाः स्वद्वः व ७०० किलोमिटर शान्ति पदयात्रा याःगु खः। थुकिया नेतृत्व भिक्षु पन्नाकारं यानादीगु खः।

शान्ति अभियानअन्तर्गत नेपाः वःगु थ्व टोलीइ भिक्षु पन्नाकारा, वय्कःया गुरुलिसें दुथ्याः। थ्व लिसें पदयात्राय् अमेरिकाया स्वद्वः व ७०० किमी पदयात्रा पुवंकूम्ह नांजाःम्ह अलोका नांया खिचा नं नापं दु। वय्कःपिं थाइल्याण्डं दिल्ली जुयाः नेपाः झाःगु खः। शान्ति भीडं वइमखु धकाः बुद्धं थःगु दुनुगलं माःथें भिक्षुं शान्ति हयेत छुं नं महायज्ञ व अनुष्ठान मयाःसे अशान्त जूगुया कारण माःगु धयातःगु खः। सिद्धार्थ गौतम बुद्ध जुइ धुंकाः नं छुं नं विजययात्रा मयाः। बरु ज्ञान इनेगुपाखे वंथें थुपिं भिक्षु नं बुद्धया उगु हे लँय् न्ह्यज्यानाः थन थ्यंकः झाःगु खः।

निभाः, वा, च्वापु व थी थी कठिनाइ दथुइ नं भिक्षुतय्गु साथ मत्वःतेगु अलोकां करुणा, मैत्री, निष्ठा व सहअस्तित्वया अनुपम दसु प्रस्तुत याःगु खः। अमेरिकाय् भिक्षुलिसें १०८ न्हुतक स्वद्वः व ७०० किलोमिटरस्वयां अप्वः दूरी पार यानाः शान्ति पदयात्रा अभियानपाखें लखंलख मनूतय्गु नुगः त्याकूम्ह ‘अलोका’ नांया खिचा व भियतनामी भिक्षुया टोली सोमबाः नेपाः थ्यंकःवःगु खः।

बुद्धया शिक्षां धाइ, ‘शान्ति पिनें वइमखु, शान्ति झीगु नुगलं सुरु जुइ’ । थ्व पदयात्रां उगु हे सन्देशयात अझ ध्वाथुइक लुमंकाबिल, मनू जक मखु, फुक्क प्राणीइ मैत्री व करुणा तब्याकेफःसा जक धात्थें हे शान्ति सम्भव दु।

Categorized in राष्ट्रिय