उपराष्ट्रपति रामसहायप्रसाद यादव रुसया राष्ट्रिय दिवसया लसताय् बुधबाः सनिलय् थन ग्वसाः ग्वःगु लसकुस समारोहय् ब्वति कयादीगु दु।

उगु लसताय् नेपाःया निंतिं रुसी राजदूत अलेक्सेई भ्लादिमिरोभिच सुरोभ्त्सेभं असंलग्नता लिसें पञ्चशीलया सिद्धान्तय् लिधनाच्वंगु नेपाःया सार्वभौम परराष्ट्र नीतियात रुसं न्ह्याबलें उच्च मूल्याङ्कन यानाः वयाच्वनागु धयादिल। नेपाः व रुस लुमुगु स्वापूयात कयाः चर्चा यानादिसें वय्कलं आः वइगु साउन ४ गते निगू देय् दथुइ कूटनीतिक स्वापू पलिस्था जूगु ७० दँ पूवनीगु धयादिल। “नेपाः व रुस दथुया निगू पक्षीय स्वापूया सन्दर्भय् थुगु दँ झीगु निंतिं विशेष दु।

आः वइगु जुलाई २० य् झीगु दथुइ कूटनीतिक स्वापू पलिस्था जूगु ७० क्वःगु वार्षिकोत्सव जक मखु, सद्भाव, थःथवंय् हनाबना व जनस्तरया स्वापुइ लिधना च्वंगु दीर्घकालीन मित्रता ७० दँ पूवंगु लसता नापं न्यायेके त्यनागु दु”, वय्कलं धयादिल।राजदूत सुरोभ्त्सेभं नेपाः व रुस दथुइ थःथवंय् विश्वास व समझदारीइ लिधनाच्वंगु ताःहाकःगु लिसें मैत्रीपूर्ण स्वापू दूगु धयादिल।

नापनापं वय्कलं आः वइगु दिनय् नेपाः व रुस दथुया मित्रता व मंकाः ज्या अझं क्वात्तुना वनीगु विश्वास प्वंकादिल।

Categorized in राष्ट्रिय