मेयर फोरमया स्वक्वःगु मुँज्या किपूलि जुइगु
नृपेन्द्रलाल श्रेष्ठ | चिल्लाथ्व सप्तमी ११३९ (मार्च १३ २०१९)
येँ व भ्वँतय् ऐतिहासिक सम्पदा संरक्षणया बारेय् छलफल यायेत ग्वसाः ग्वःगु निक्वःगु मेयर्स फोरमया स्वक्वःगु मुँज्या किर्तिपुर नगरपालिका यायेगु निर्णय याःगु दु ।
यल महानगरपालिकाय् जुगु उगु निक्वःगु मेयर्स फोरमया मुँज्या उगु निर्णय याःगु खः । मुँज्या लिपा तःभुखाय्लिपा पुनःनिर्माण, ऐतिहासिक बस्ती, मुर्त व अमूर्त सम्पदाया संरक्षणया सन्दर्भय् छलफल जुगु खः । फोरमं मुँज्या दँय् दस जुइगु खः । न्हांपागु मुँज्या पनौति नगरपालिकाय् जुगु खः । यल मनपाया मेयर महर्जनं स्वक्वःगु मुँज्याया लागि किर्तिपुर नगरपालिकाय् यायेगु प्रस्ताव तःगु खः ।
मेयर महर्जनं सम्पदा संरक्षणमय लागि सार्वजनिक खरिद ऐन २०६३ बाधक दुगु बिचाः तयादीसे थुकियात तत्काल संशोधन याना न्ह्या वने माःगु धका बिचाः तयादीगु खः । वयकलं ‘थुगु ऐन अनुसार सम्पदा निर्माण यायेगु खःसा ठेकेदार जकः ल्ह्वनिगु, सम्पदा कुरुप जुया वनि धकाः न धयादील ।
उपमेयर गीता सत्यालं यल नगरया म्हसिका धइगु सम्पदा खः धयादीसें थुकिइ सरक्षण यायेत प्रतिवद्ध दु धका स्पष्ट यानादील ।
किपू नगरपालिकाया मेयर रमेश महर्जनं स्वक्वःगु मेयर्स फोरमया याये दइगु किपूया लागि महत्वपूर्ण अवसर जुइगु धयादीसे गुठी संस्थान याके दुगु बजेटयात मूर्त व अमूर्त सम्पदा संरक्षणया लागि छ्यलेत मेयर्स फोरमं पहल याये माःगु बिचाः तयादील ।
उगु मुँयाय् १४ गु नगरपालिकाया मेयर, उपमेयर व सम्पदा क्षेत्रय् जिम्मेवारी कयातपिं इञ्जिनियर पिनिगुु ब्बति दुगु खः ।
