भेनेजुएलाय् बुधबाः सनिलय् ब्वःगु शक्तिशाली भूखाचं यानाः म्होतिं स्वीनिम्ह सीगु लिसें न्हय्सलं मल्याक्क घाःपाः जूगु कार्यवाहक राष्ट्रपति डेल्सी रोड्रिग्जं जानकारी बियादीगु दु।

उद्धार लिसें मालेगु अभियान न्ह्यानाच्वंगुलिं हःताः जूपिनि ल्याः अझं अप्वयेफइगु वय्कलं हाथ्याः बियादीगु दु।देय्या थीथी थासय् ७.२ व ७.५ म्याग्निच्युडया निगू शक्तिशाली भुखाय् लिपा तःल्याखय् भवनत दुनाः वंगु दुसा आपत्कालीन पुचःत प्रभावित क्षेत्रय् उद्धार लिसें राहत ज्याय् खटे जुयाच्वंगु दु।

कार्यवाहक राष्ट्रपति रोड्रिग्जया कथं ला गुआइरा राज्य दकसिबे अप्वः प्रभावित जूगु दु। वय्कलं उगु लागां गम्भीर मानवीय सङ्कट फयाच्वंगु धयादीगु दु। वय्कःया कथं अप्वः धयाथें भवन ध्वस्त जूगु दु व दुनांः च्वंगु थासय् कानाच्वंपिं मनूतय्गु उद्धारया निंतिं सुरक्षाकःमिया नापनापं आपत्कालीन पुचःत मदिक्कं परिचालन यानातःगु दु। रोड्रिग्जं ला गुआइरायात विपद् प्रभावित क्षेत्रया कथं धयादिसें जीवन रक्षा सरकारया न्हापांगु प्राथमिकता जूगु धयादिल।

वय्कलं उद्धारकःमिपिसं तसकं थाकूगु इलय् नापं मनूतय्गु जीवन रक्षाया निंतिं मदिक्कं कुतः याना च्वंगु न्ह्यथनादिल।सरकारं प्रभावित क्षेत्रय् राहत लिसें उपचार सेवायात तच्वयेकूगु दुसा क्षतिया पाय्छिगु वास्तविक विवरण संकलन यायेगु ज्या नापं न्ह्याना च्वंगु धाःगु दु।

Categorized in अन्तर्राष्ट्रिय