दँय् दसं असार १५ गते न्यायेकीगु ‘धान दिवस’ थौं बुँइ ज्या यानाः धौ बजि नयाः न्यायेकाच्वंगु दु।

सिनाज्यापाखें त्यानुपिं किसानतय् शक्ति कायेगु निंतिं धौ बजि नयेगु याइ। थुगु इलय् धौ बजि नलकि म्हय् सिचुसे च्वनाः शक्ति सञ्चय जुइगु विश्वास यानातःगु दु। असार १५ यात नेपाली समाजय् धौ बजि नयेगु पर्वया कथं नापं काइ। बुँज्या याइपिं बाहेकं मेमेगु लजगाः याइपिंसं नापं थौंया दिनय् धौ बजि नयाः असार १५ न्यायेकी। झीगु संस्कृतिइ धौया तःधंगु महत्व दु।

छुं नं कथंया भिंगु ज्याय्, छेँ नं पिहां वनीबले, विदेश भ्रमण लिसें छुं नं कथंया भिंगु ज्या याये न्ह्यः धौ जाकिया सिन्ह तिइगु नापनापं धौ नयेगु व नकीगु परमपरा दु। थुजाःगु भिंगु ज्याय् पिहां वने न्ह्यः सगंया कथं नापं धौ नकाः बिदा यायेगु याइ । गनं वने न्ह्यः धौ नयाः वन धाःसा जक भिंगु साइत जुइगु जनविश्वास दयाच्वंगु दु।

धौ वैज्ञानिक ल्याखं नापं स्वास्थ्यवद्र्धक कथं कयातःगु दु।विसं २०६१ मङ्सिर २९ गते मन्त्रीस्तरीय निर्णय यानाः २०६२ असार १५ गते नं निसें राष्ट्रिय धान दिवस न्यायेकेगु याना हःगु खः । कृषि प्रधान देय् जूगुलिं नेपाःया अप्वः धयाथें मनूतय् मू लजगाः धयागु हे बुँज्या खः।

Categorized in राष्ट्रिय