राष्ट्रिय विपद् जोखिम न्यूनीकरण लिसें व्यवस्थापन प्राधिकरणं थ्वहे असार १६ व १७ गते देय्या थीथी थासय् वा वइगु लिसें छथाय् निथाय् तसकं वा वइगु ह्वःताः दूगुलिं माःगु कथं पूर्वतयारी व सतर्कता नालाकायेत इनाप याःगु दु।

प्राधिकरणं म्हिगः छगू सुचं जारी यासें छत्थुं तसकं खुसिबाः वयेपूmगुलिं खुसि बाय् चिचिधंगु खुसिचा जुयाः इरुथिरु जुइपिंत सतर्क जुयाः जुइत इनाप याःगु खः। अथे हे चलःया ग्याचिकु दूगु थासय् व खुसि सिथय् च्वनिपिंत सतर्क जुयाः च्वनेत प्राधिकरणं इनाप याःगु दु।

थ्व निन्हु मधेस लिसें कोशी, बागमती, गण्डकी, लुम्बिनी व सुदूरपश्चिम प्रदेशया पहाडी लिसें तराई भूभागया छु्ं भचा थासय् नं न्यानाः मलः कुतुं वइगु लिसें तसकं वा वइगु व छथाय् निथाय् तःच्वकं वा वइगु ह्वःताः दूगु प्राधिकरणं धाःगु दु। पहाडी व तराई भू–भागया अप्वः धयाथें थासय् नापनापं हिमाली भूभागया छुं छुं थासय् नापं नं न्यानाः मलः कुतुं वइगु लिसें मध्यम कथं वा वइगु ह्वःताः दूगु धयातःगु दु। मनसुनी गतिविधि अप्वःगु इलय् छत्थुं खुसिबाः, चलः, कटान, ध्याचः चुइकाः हइगु, सहरी लिसें तराई क्षेत्रय् डुबानया ग्याचिकु नापं जुइ फइगु धासें प्राधिकरणंं माःगु कथंया सतर्कता छ्यलेत व पूर्वतयारी यायेत इनाप याःगु खः ।

प्राधिकरणं दुबे जुइगु याना च्वंगु बस्तीइ च्वनीपिंत माःगु कथं ततः जाःथाय् व सुरक्षित थासय् च्वनेत नापं स्वंगूलिं तगिंया सुरक्षा निकाय, स्थानीय तगिं, स्वयंसेवक लिसें सरोकारवालात फुक्क निकाययात प्रतिकार्यया निंतिं तयारी अवस्थाय् च्वनेत इनाप याःगु खः। अथे हे, जोखिमयुक्त राजमार्ग व सतकय् डोजर, एक्साभेटर, लोडरलिसेंया साधनत तयारी अवस्थाय् तयेत नापं पूर्वतयारी, पूर्वकार्य व प्रतिकार्यय् ग्वाहालि यायेत साझेदार संस्थायात जिल्ला विपद् व्यवस्थापन समिति व स्थानीय विपद् व्यवस्थापन समितिया स्वापूतिइ च्वनाः ज्या यायेत प्राधिकरणया इनाप दु।

वा व खुसिबाःया बारेय् जानकारी कायेत ११५५, विपद ग्वाहालि फ्वनेत ११४९, नेपाल प्रहरी १०० व सशस्त्र प्रहरी बल, नेपालया १११४ हटलाइन नम्बर मोबाइलय् ‘सेभ’ यानाः माःगु अवस्थाय् उघ्रिमय् हे फोन यायेत इनाप याना तःगु प्राधिकरणया प्रवक्ता शान्ति महतं जानकारी बियादिल।

Categorized in राष्ट्रिय