देगः म्हिचा सफुया ग्वसालय ने सं ११४६ तछला थ्व १४ (असार १४) कुन्हु अर्थात म्हिगः यल कोपुण्डोलय सातोआकी भवनया सभा हलय् कवि नारद वज्राचार्यया कविता सफू ‘धुँ जंगलं पिने दु’ व मयजु निभाः वज्राचार्यया नियात्रा सफू ‘देशय् दुने : देशं पिने’ या पितब्वज्या ज्याझ्वः तःजिइक जुल।

देगः म्हिचा सफु पाखें बाखं च्वमी भरत साःमिं दबुलिइ च्वनादिइपिं पाहांपिंत खादां क्वखायेका दिइगु उगु ज्याझ्वलय वरिस्ठ कविपिं योगेन्द्र प्रधान,डा.केशवमान शाक्य, पुष्प तुलाधर, श्रीराम श्रेष्ठ, रासा, प्रतिसरा साय्मी, रजनी मिला अथे हे नियात्रा च्वमिपिं बंशिधर वज्राचार्य, राजेन मानन्धर, बिमलप्रभा वज्राचार्य, दिब्या ताम्रकार, वरिष्ठ पत्रकार नरेशबिर शाक्य लिसें यक्व यक्व साहित्यकार, कवि, बुद्धिजीवीपिनि ब्वती दुगु खः । हनेबहःपिनिगु सुवाः कासे च्वमी व ब्वमिपिसं मंकाः कथं उगु निगुली सफुया तःजिक बिमोचन यानादिइगु जगु खः।

ज्याझ्वलय लसकुस यानादिसें कबि नारद वज्राचार्यं बःचाहाकलं थःगु कविता या बारे कनादिल अले नियात्रा साहित्य विधाय  खनेदयेकः वःम्ह निभाः वज्राचार्यया नियात्रा लेखन यात कयाः वयेकःया नियात्रा चलचित्र थें जु धकाः नं धयादिल। अथे हे नेवाःहाइकु ख्यःया नायः सुरेश प्रधानं भिन्तुना न्वचु बिइगु झ्वलय निम्हं च्वमिपिनी सफु पिथनेगु झ्वलय थम्हं प्रत्यक्षय रुपं ग्वहाली यायेखंगु खँ नं कनादिल। नियात्रा च्वमी निभाः वज्राचार्यं थःगु नियात्रा सफु कविता संग्रह ‘देशय दुने : देशंपिने’ सफुतिइ थःपिसं ज्याया सिलसिलाय थिथी देश व थासय वनाबलय, चाःहिउ वनाबलय यागु यात्रा बिबरण जक न्ह्यब्वयागु मखुसे अन दुने सुलाच्वंगु बाखंयात नं अनुभव यानाः, अनया  थिथी संस्कृति, इतिहास, सभ्यता, जीवन व जीवनशैलीयात नं न्ह्यब्वयेगु कुतः यानागु खँ कनादिल। नेपालभासा येकेदेमिया उप कुलपती डा.पुष्प राजकर्णिकारं कवि नारद वज्राचार्यया धुँ जंगलं पिने दु सफुयात कयाः बःचा हाकलं समालोचना यानादिल।

समालोचनाया झ्वलय वयेकलं कवि नारदं न्ह्यब्वःम्ह धुँ जंगलय च्वंम्ह हिस्रक धुँ जक मखुसे मानबिय संवेदनां जाःम्ह, देश भक्तिं जाःम्ह धुँ नं खः धयादिल। अथेहे च्वसापासाया नायः भुषणप्रसाद श्रेष्ठं  नेपालभासा साहित्य नियात्राया इतिहासयात कुलादिसे बिमोचन जुगु सफुया निम्हं च्वमितयेत भिन्तुना बियादिल। लिसें वयेकःपिं पाखें नेपालभासा साहित्य धुकु थकायेगु ज्याय निरन्तरता बिया च्वनादिइ।

ज्याझ्वःया साहित्यकार नाप संपादक रमेशकाजी स्थापित निभाः बज्राचार्यया नियात्रा सफु देशय दुने व देशं पिने सफुती भुमिकाय फुक्क च्वसुया समिक्षा यानागु दु धकाः धयादिसे नियात्रा साहित्यय यात्राया बिबरण जक न्ह्यब्वयेगु मखुसे उकिइ जीवन नं दयेमाः अले जक व नियात्रा साहित्य जुई धकाः धयादिल।

पुर्णिमा शाक्यं न्ह्याकादिइगु उगु ज्याझ्वलय् नियात्रा च्वमी निभाः वज्राचार्यं पाहांपिन्त मतिनाया चिं देछानादिइगु खः।

Categorized in राष्ट्रिय