नेवाःतय् ज्ञानया धुकू कथं कयातःगु नेवाः सांस्कृतिक ज्ञानकोषया अनलाइन संस्करणया आइतवाः पितब्वज्या जूगु दु। येँ महानगरपालिकाया सहकार्य नेपालभाषा एकेदेमिं पिथंगु सच्छि व खुइ न्हयगू (१६७ गू) भासं ब्वनेफइगु ज्ञानकोषया अनलाइन संस्करण येँ महानगरपालिकाया कार्यवाहक प्रमुख सुनिता डंगोलं छगू ज्याझ्वःया दथुइ पितब्वज्या यानादीगु खः।

थ्व संस्करण रञ्जना व नेपाल लिपिं नं लिपि हिइका ब्वनेजिउगु व्यवस्था यानातःगु दु। थ्व नापं च्वसु चीहाकयेक ब्वनेमाःसा संक्षेपीकरण यायेजिउगु एआई प्रविधि नं अनलाइनय् दुथ्याकातःगु दु । ज्याझ्वलय् ज्ञानकोषया अनलाइन नापं मोबाइल भर्सनया नं पितब्वज्या जूगु खः।

आःयात एन्ड्रोइडय् जक डाउनलोड यानाः स्वयेफइगु जूसां छवाः लिपा आइओएसयूनं उपलब्ध जुइगु खँ धाःगु दु।ज्याझ्वलय् येँ महानगरपालिकाया कार्यवाहक प्रमुख सुनिता डंगोलं नेवाः संस्कृतिया ख्यलय् थ्व छगू तःधंगु महत्वपूर्ण ज्या जूगु धयादिल। डंगोलं अनलाइनय् नेवाः ख्यःया विषय वस्तुत मेमेगु भाय् व लिपिपाखें ब्वनेदइगु धयागु तसकं उपलब्धीपूर्ण ज्या जूगु बिचाः प्वंकादिल। अथेहे ज्याझ्वलय् अनलाइन नेवाः ज्ञानकोष योजनाया प्राविधिक कजि नापं एकेदेमिया प्राज्ञ परिषद्या दुजः डा. ऐलेन बैलोचन तुलाधरं डिजिटल संस्करणय् दुथ्याःगु विषय वस्तुया बारे कनादिल।

अनलाइनय् ज्ञानकोषया न्यागुलिं सफू दुथ्याःगु विषयत डिजिटाइजेशन यायेगु ज्या जक जूगु मखुसे मेमेगु प्राविधिक विधियात नं दुथ्याकेगु ज्या जूगु खँ प्राविधिक कजि तुलाधरं कनादिल।वय्कलं डिजिटाइज यायेगु ज्या नापनापं भाय् हिलेगु ट्रान्सलेसन इन्जिन व आखःयात ब्वनेफइगु टेक्सट टु स्पीच प्रविधि नं थःपिंसं हे विकास यानाः थुकी दुथ्याकाःगु खँ न्ह्यथनादिल । नेपालभाषा एकेदेमिया चान्सलर नापं ज्ञानकोषया परिकल्पनाकार मल्ल के. सुन्दरं ज्ञानकोषयात डिजिटाइज यायेत डा. एलेन बैलोचन तुलाधरं तसकं तःधंगु योगदान बियादीगु खँ धयादिल।

अथेहे वय्कलं ज्ञानकोषया परिकल्पना यानागु दिं लुमंकुसे धुकीयात आर्थिक रुपं ग्वहालि याःगु येँ महानरपालिकाया कुतः यात नं च्वछायादीगु खः । एकेदेमिया भाइस चान्सलर डा. पुष्पराज राजकर्णिकारं लसकुस यानादीगु ज्याझ्वःयात दांभरी वीरप्रसाद भंसारीं सुभाय् देछानादीगु खः । ज्ञानकोषया अनलाइन परियोजना येँ महानगरपालिकाया आर्थिक ग्वाहालिं जूगु खः ।

Categorized in राष्ट्रिय