मोरक्कों नेदरल्यान्ड्यात पेनाल्टी सुटआउटय् बुकाः फिफा विश्वकप फुटबल २०२६ या लिपांगु १६ गूगुलिइ थ्यंकूगु दु।मेक्सिकोया मोन्टेरे स्टेडियमय् थौं सुथय् जूगु कासाय् मोरक्कों नेदरल्यान्डसयात पेनाल्टी सुटआउटय् ३–२ गोलअन्तरं बुकाः विश्वकप फुटबलया लिपांगु १६ गूगु पुचलय् थाय् दयेकूगु खः।

थौंया कासा बूगु लिसें नेदरल्यान्ड्स विश्वकपया धेंधेंबल्ला पाखें पिहांवंगु दु। पेनाल्टी सुटआउटय् नेदरल्यान्ड्सं न्हापां गोल याः बले मोरक्कोया कासामिं थ्वाःगु बल धाःसा पिने वंगु खः। नेदरल्यान्ड्सं थ्वाःगु बल ताः मलाःबले मोरक्कों धाःसा गोल यात। निगूलिं पुचःया छगू छगू गोल व छगू छगू पिने लाः वन। दकसिबें लिपा नेदरल्यान्ड्सया कासामिं थ्वाःगु बल मोरक्कोया गोलकिपरं पनाब्यूबले मोरक्कों धाःसा निर्णायक गोल यात।

थ्वसिबे न्ह्यः क्वःछिनातःगु ९० मिनेट व उकिया लिपाया थप ३० मिनेटया इलय् नापं निगूलिं पचुलं छगू छगू गोलया बराबरी म्हिते धुंकाः धेंधेंबल्ला पेनाल्टी सुटआउटय् वंगु खः। लिपांगु हाफ गोल मजूसे बराबरीइ सिधःगु खःसा निगूलिं गोल कासाया निगूगु हाफय् जूगु खः। धेंधेंबल्लाया ७२ गूगु मिनेटय् नेदरल्यान्ड्सं न्हापां गोल यात। वयागु निंतिं कोडी गाक्पोकों गोल यात। वय्कलं क्राइसेन्सियो समरभिलया पासय् गोल यानाः थःगु देय्यात कासाय् न्हापं न्ह्यने लाकल।

उकिया लिपा कासाय् निगूगु हाफया इन्जुरी इलय् मोरक्कों बराबरी गोल यात । मोरक्कोया इसा डिओपं गोल यानाः धेंधेंबल्लायात छगू छगू गोलया बराबरीइ हल। वय्कलं चेम्सडाइन ताल्बीया पासय् गोल याःगु खः । नेदरल्यान्ड्स त्याये धुंकूगु कासाय् मोरक्कों याःगु बराबरी गोल लिपा धेंधेंबल्ला रोमाञ्चक जूवंगु खः।थ्वसिबें न्ह्यः थौं हे सुथय् अमेरिकाको बोस्टन स्टेडियमय् जूगु मेगु कासाय् दक्षिण अमेरिकी राष्ट्र पाराग्वें जर्मनीयात सडनडेथय् ४–३ गोलं बुकाः लिपांगु १६ गूगु पुचलय् थ्यंकूगु दु।

कासाया क्वःछिनातःगु ९० मिनेट व उकिया लिपाया थप ३० मिनेटया इलय् १–१ गोलया बराबरी क्वचायेके धुंकाः कासा पेनाल्टी सुटआउटय् वंगु खः ।न्ह्याना च्वंगु विश्वकपय् पेनाल्टी सुटआउटपाखें निर्णय जूगु थ्व न्हापांगु धेंधेंबल्ला खः । 

Categorized in कासा