नेवाः पत्रकार राष्ट्रिय दबू, येँ जिल्ला शाखाया तःमुँज्या थ्वहे वइगु ने.सं.११४६ दिल्लाथ्व पञ्चमी श्रावण २ गते सनिवार जुइत्यंगु दु।

येँ जिल्ला तःमुँज्याया नितिं नेवाः पत्रकार राष्ट्रिय दबूया केन्द्रीय छ्याञ्जे राजु नापितया कजिसुइ ल्यूछ्याञ्जे प्रजित शाक्य व सुनिता महर्जन ल्यू कजि ल्यया गठित तदर्थ समितिं तःमुँज्या याकेत्यंगु जानकारी पत्रकार दबूया मूछ्याञ्जे केके मानन्धरं बियादीगु दु।

दबूया केन्द्रीय तःमुँज्या भदौ १९ व २० गते गोरखा जिल्ला भिमसेन थापा गाउँपालिका ५ मिलनवस्तीइ यायेगु क्वजिया फुक्क जिल्लायात असार १५ गते तक जिल्ला तःमुँज्या क्वचायेकेत परिपत्र जूगुलिइ मेमेगु जिल्लाय् अधिवेशन क्वचाये धुंकूगु दुसा येँ जिल्लाय् धाःसा तःमुँज्या यायेत ज्यासना पुचलं पहल मयागुलिं केन्द्र हे तदर्थ समिति गठन याना तःमुँज्या यायेत्यंगु खः।

उकिया नितिं न्हू दुजः दुतिनेगु व पुलांपिं दुजः न्हूधाः यायेगु ज्या न्ह्याये धुंकूगु नं मू छ्याञ्जे मानन्धरं जानकारी बियादिल। वय्कःया कथं आःतक नीन्यागू जिल्लाय् तःमुँज्या क्वचाये धुंकूगु दुसा झिंनिगू विदेश विभाग गठन याना कजि ल्ययेगु ज्या नं क्वचाये धुंकूगु दु।

Categorized in राष्ट्रिय