विश्व कपय् गुलाबी बुटया चर्चा
प्रजित शाक्य | तछलागा तृतिया ११४६, असार १८ बिहीवाः
सन् २०२६ या विश्वकपय् किलियनन एमबाप्पे व ह्यारी केनं न्हापांगु कासाय् निगू निगू गोल यायेधुंकल । ब्राजिलया सुपरस्टार स्ट्राइकर भिनिसियस जुनियरं नं छगू गोल याःगु दु । अमेरिकाया जियो रेनां नं शानदार गोल यात । थुपिं सकस्यां गोल याबलय् छगू समानता दु, व खः गोल यायेबलय् फुक्कसिनं गुलाबी रङगया लाकां (बुट) न्ह्यानातःगु खः ।
अमेरिका, क्यानाडा, मेक्सिकोय् जुयाच्वंगु विश्वकपय् आः गुलाबी रंगया बूट चर्चाया विषय जुयाच्वंगु दु । विश्वकपय् ब्वति काइपिं दर्जनौं कासामिपिसं गुलाबी रंगया बूट न्हयानातःगु दु, गुगु बूट वांगु ख्यलय् तसकं आकर्षक खनेदु । थुगु विश्वकपया निंतिं विश्वया अग्रणी खेलकुद कम्पनीतसें गुलाबी रंगया बूट उत्पादन याःगु खः ।
कासामिपिसं थ्व रंगयात आत्मविश्वासया प्रतीकया रुपय् काइगु नाइकीया निर्देशक ओडिङ्गा निमाकों धाःगु दु । सन् १९९८ या विश्वकपय् नाइकीं ‘सिल्भर’, ह्याउँगु, व वचुगु बूट हयेधुंकाः सकसिगुं ध्यान बूटपाखे वंगु खः । वयां न्हापा फुटबलय् हाकुगु व तुयुगु बुट जक न्ह्यानाः म्हितिगु चलन दु ।
थुगुसी विश्वकपय् नाइकी, एडिडास, पुमा, स्केचर्स, न्यू ब्यालेन्स थेंज्याःगु तःधंगु कम्पीतयसं गुलाबी रंगया बुट ज्वनावःगु दु । एमबाप्पे व भिनिसियसया तुतिइ गुलाबी रंगया नाइकीया बुट दु । पोर्चुगलया क्रिस्टियानो रोनाल्डो व नर्वेया इर्लिङ हालान्ड, रेइना, इंग्ल्याण्डया युड बेलिङ्घम व डेक्लान राइस, क्यानाडाया जोनाथन डेभिड, स्पेनया लामिन यामाल व फ्रान्सया ओसमान डेम्बेले एडिडासया बुटय् म्हिताच्वंगु दु ।
चोटया हुनिं नेयमार जुनियरं थुगुसी विश्वकपय् म्हिते मखंनी । अथेखसां विश्वकप म्हितीबलय् नेमार पुमाया गुलाबी रंगया बुटये खनेदइ । अमेरिकाया वेस्टन म्याककेनी व टिमोथी वेह न्यू ब्यालेन्सया गुलाबी रंगया बुटय् म्हिताच्वंगु दु । विश्वकपय् स्वीडेनया एन्थोनी एलांगा व केनं नं स्केचर्सया गुलाबी रंगया बुट न्ह्यानाः गोल याःगु दु । स्वीडेनं ट्युनिसियायात ५ गोलं बुकूगु कासाय् गुलाबी रंगया बुट न्ह्यानाः म्हितुपिं स्वम्ह कासामिं गोल याःगु खः ।
अल्मिरोन ख्वाः त्वःपुगुलिं रेड कार्ड काःम्ह न्हापांम्ह कासामि
पाराग्वेया मिडफिल्डर मिगुएल अल्मिरोन विश्वकपय् ख्वाः त्वःपुया खँ ल्हाःगु जूगुलिइ रेडकार्ड काःम्ह न्हापांम्ह कासामि जूगु दु । विवादया इलय् प्रतिद्वन्द्वीलिसे खँ ल्हायेगु झ्वलय् ख्वाः त्वःपुइम्ह कासामियात रेडकार्ड बीगु न्हूगु नियम खः । फिफाया कथं यदि छम्ह कासामिं प्रतिद्वन्द्वीलिसे खँ ल्हायेबलय् ल्हाः वा कमिजं ख्वाः त्वःपुल धाःसा व व्यवहारयात रेफ्रीं फ्रेन्ड्ली खँल्हाबल्हा स्वयां नं द्वन्द्वया स्थिति तायेकल धाःसा रेड कार्ड बीफइ । च्याम्पियन्स लिगया छगू कासाया झ्वलय् बेन्फिकाया जियानलुका प्रिस्टियानीं रियल म्याड्रिडया विनिसियस जुनियरयात नश्लीय अपशब्दपाखेँ अपमान यायेधुंकाः थ्व नियम लागू याःगु खः ।
अल्मिरोनं थःत मयःगु कीर्तिमान तःगु खःसां पाराग्वेया हे मेम्ह कासामि माटियासं धाःसा व हे कासाय् बांलागु कीर्तिमान तःगु खः । टर्की विरुद्धया कासाय् माटियासं ६५ सेकेण्डय् गोल याःगु खः । थ्व विश्वकपया दकलय् याकनं जूगु गोल खः ।
समूह थर्ड टिम गथे नकआउटय् थ्यनी
सन् २०२६ या विश्वकपय् कीर्तिमान ४८ गू टिम दुथ्याःगु दु । उकिं थुगुसी समूह चरणय् स्वंगूगु थासय् लाःसां आपालं टिम नकआउट चरणय् दुहां वनीगु जूगु दु । थुगुसी आपालं टिम न्हापाखुशी नकआउट चरणय् थ्यन धाःसा अजूचाय् म्वाः ।
अमेरिकां सन् १९९४ य् विश्वकपया आयोजना याःगु इलय् २४ गू टिम दुगु खः । उगु इलय् १६ गू पुचः नकआउट चरणय् छनोट जूगु खः । सन् १९९८ या विश्वकप ३२ गू टिमय् विस्तार जुइधुंकाः नकआउट चरणय् थ्यंकेगु गणित अःपुल । व इलय् प्यंगू टिमया च्यागू पुचलय् शीर्ष निगू टिम नकआउटय् थ्यनिगु अपुगु समीकरण जुल । थुगुसी अन्तिम ३२ निसें नकआउट सुरु जूइगु जुलिं थुकिं स्वंगूगु थासय् लाःगु टिम नकआउटय् थ्यनीगु समीकरण हाकनं वल । समूह चरण क्वचायेधुंकाः स्वंगूगु थासय् लाःगु १२ गू टिममध्ये च्यागू टिम नकआउट चरणय् वनीगु जूगु दु ।
स्वंगूगु थासय् लाःगु पुचःयात गथे यानाः क्वःछीगु खः ।
समुह चरणं समूहया च्यागू टिम उत्कृष्ट थर्ड जुयाः न्ह्यःने वनी । थ्व उत्कृष्ट थर्डया निर्णय अंकया आधारय् जुइ, तर आपालं टिमया ल्याः उलि हे दइगु निश्चित दु । उकिं, ल्याः बराबरी जूसा, न्हापांगु प्राथमिकता धयागु गोल अन्तर खः । निगूगु प्राथमिकताय् म्हो गोल याःगु टिम जुइ । गोलया अन्तर बराबरी जुल धाःसा म्हो गोल याःगु टिम न्ह्यःने वनी । स्वंगूगु प्राथमिकताय् समूह चरणय् रेड व यल्लो कार्डया ल्याःया आधारय् टिमया फेयर प्लेयात काइ । गुलि म्ह्वः कार्ड, उलि हे बांलाइ । यल्लो कार्ड स्वयां रेड कार्डं टिमया फेयर प्ले स्कोरय् अप्वः नकारात्मक लिच्वः लाकी । यदि फेयर प्ले ल्याखय् नं बराबरी जुल धाःसा फिफाया विश्व वरियता अन्तिम टाइब्रेकर जुइ ।
