मिलनबस्तीं नेवाः पत्रकारया न्हूगु सन्देश
नृपेन्द्रलाल श्रेष्ठ अध्यक्ष, नेवाः पत्रकार राष्ट्रिय दबू | तछलागा तृतिया ११४६, असार १८ बिहीवाः
गोरखा नामं हे नांजाःगु ऐतिहासिक गोरखा जिल्लां हाकनं छकः मेगु ऐतिहासिक क्षणया साक्षी जुइगु अवसर चूलाकीगु जूगु दु । नेवाः पत्रकार राष्ट्रिय दबूया न्याक्वःगु राष्ट्रिय महाधिवेशन २०८३ साल भदौ १९ र २० गते गोरखाया भिमसेन थापा गाउपालिका ‘मिलनबस्ती होमस्टे’ य् जुइत्यंगु दु ।
मिलनबस्ती केवल छगू व्यवस्थित बस्ती जक मखु थ्व विपत्तियात अवसरय् हिलेत सफल नेपाःमितय् प्रेरणादायी दसू नं खः । २०७२ सालया विनाशकारी भुखाचं धः, त्वःनेगु लः, मत, सडकलगायतया आधुनिक पूर्वाधारसहित छगू हे कथंया १२७ खा छेँ दयेकाः विकसित याःगु थुगु बस्ती थौं ग्रामीण विकास व सामुदायिक एकताया उत्कृष्ट नमूना जूगु दु । गोरखा सदरमुकामं थ्यंमथ्यं २३ किलोमिटर उत्तर–पूर्वय् लाःगु थुगु बस्ती प्राकृतिक सौन्दर्य, आत्मीयता व अनुशासनका कारण थन वइपिनिगु नुगः त्याकेत ताः लाःगु दु ।
थुगु बस्तीया मेगु विशेषता थुकिया संघर्षपूर्ण इतिहास खः । जनयुद्धया झ्वलय् थनया न्याम्ह वीर सन्तानपिसं थःगु अमूल्य जीवन बलिदान याःगु दु । उमिगु बलिदानयात सम्मान यासें थनया सतकया नां ‘शहिद हरिश्चन्द्र मार्ग’, ‘शहिद शिव मार्ग’, ‘शहिद मिरा मार्ग’, ‘शहिद बुद्धि मार्ग’, ‘शहिद शान्ति मार्ग’ लिसे ‘बेपत्ता संजय मार्ग’ नामकरण यानातःगु दु । थुगु सतक न्यासि वनेगु लँपु जक मखु इतिहास, त्याग व स्मृतिया म्वानाच्वंगु दस्तावेज नं खः ।
जिपिं थ्वहे सुन्दर बस्तीइ वंगु .................... गते नेवाः पत्रकार राष्ट्रिय दबू, गोरखा जिल्ला अधिवेशन क्वचायेकेगु सौभाग्य चूलात । येँ नं वंगु केन्द्रीय पुचःयात मिलनबस्ती होमस्टेया सञ्चालक प्रेमचन्द्र श्रेष्ठ व वय्कःया समर्पित पुचलं स्वांमाः सहित तसकं आत्मीय व तःजिक लसकुस यानादीगु क्षण जिमिगु नुगलय् अझ नं ल्यँ दनि । उगु न्हिं स्थानीय अग्र्यानिक उत्पादनं दयेकूगु साःगु निगुरो तरकारी व मेगु थीथी परिकारं केवल जिमिगु पित्याः जक लंकूगु मखु, गोरखाली आतिथ्य संस्कृतिया नं अनुभूत याकल । अनया आत्मीय व्यवहार, अनुशासित व्यवस्थापन व समुदायया एकतां जिमिगु नुगलय् थीक प्रभाव लाकल ।
गोरखा जिल्ला अधिवेशनयात सफल यायेत गोरखाय् ताः इलंनिसें पत्रकारिताय् क्रियाशील पुलांम्ह पत्रकार कैलाशबाबु श्रेष्ठ, दिपक श्रेष्ठ ‘जलन’, उत्तम कुमार श्रेष्ठ, आत्माराम श्रेष्ठ, अञ्जन श्रेष्ठ, भिमसेनबाबु श्रेष्ठ, विनोद श्रेष्ठ, हिरालाल श्रेष्ठ लगायतया पासापिसं जिल्ला अधिवेशन सफलतापूर्वक क्वचायेकेत म्हितादीगु भूमिका तसकं न्ह्यथने बहःजू । वय्कःपिनिगु ग्वाहालि व समर्पणं गोरखाय् नेवाः पत्रकारिताया जग अझ धिसिलाःगु दु ।
थ्वहे आत्मीय अनुभव, उत्कृष्ट व्यवस्थापन, ऐतिहासिक चेतना व सामुदायिक एकतां प्रेरित जुयाः नेवाः पत्रकार राष्ट्रिय दबूया केन्द्रीय समितिं न्याक्वःगु राष्ट्रिय महाधिवेशन थ्वहे मिलनबस्तीइ यायेगु निर्णय याःगु खः । थुगु निर्णय केवल ज्याझ्वःया थाय् ल्ययेगु जक मखु, संघर्ष, पुनर्निर्माण, आत्मीयता व नेवाः भावनाया सम्मान नं खः ।
जिमिसं विश्वास याना गोरखाया थुगु ऐतिहासिक भूमिइ जुइगु न्याक्वःगु राष्ट्रिय महाधिवेशनं नेपाःया पत्रकारिता, नेवाः समुदायया भाषा, संस्कृति व पहिचान संरक्षण लिसे राष्ट्रिय एकताया यात्राय् न्हूगु ऊर्जा बी । थुगु महाधिवेशनं संगठनयात अझ सुदृढ दयेकाः भावी पुस्ताया निंतिं न्हूगु मार्गचित्र नं क्वःजी ।
मिलनबस्तीं जिमित छेँजःया दुजः थें मतिना बिउगु दु । आः न्याक्वःगु राष्ट्रिय महाधिवेशनं देय्न्यंकंया नेवाः पत्रकारपिं थुगु हे बस्तीइ मुनाः मित्रता, सहकार्य, सांस्कृतिक गौरव व संगठनात्मक एकताया न्हूगु इतिहास च्वइ धइगु विश्वास जिं कयागु दु । भदौ १९ व २० गते ऐतिहासिक गोरखाया सुन्दर बस्तीइ सार्क राष्ट्रया पत्रकारपिं, नेवाः पत्रकार राष्ट्रिय दबूया विदेश शाखाया प्रतिनिधि पत्रकारसहित थीथी नेवाः मौलिक संस्कृति, झाँकी व बाजागाजासहित क्वचाइगु राष्ट्रिय महाधिवेशनयात ऐतिहासिक, सभ्य, सफल व स्मरणीय दयेकेत सकलें दुजः, शुभेच्छुक, सञ्चारकर्मी लिसें स्थानीय जनप्रतिनिधि, समुदायया ग्वाहालि व ब्वतिंया निंतिं इनाप यानाच्वना ।
झासं मिलनबस्तीं नेवाः पत्रकारया एकताया न्हूगु सन्देश हलिंन्यंक न्यंके !
