येँ महानगरपालिकां बञ्चरेडाँडाय् यंकीगु फोहरया मात्रा पाः यायेत १० गू वडापाखें स्रोतय् हे फोहर वर्गीकरण व्यवस्थापन न्ह्याकूगु दु।

येँमपा वातावरण विभागया प्रमुख सरिता राईं बञ्चरेडाँडा फोहर व्यवस्थापनया आयु अप्वयेकेत स्रोतय् हे फोहरया वर्गीकरण व व्यवस्थापन न्ह्याकूगु धयादिल। महानगरपालिकां वडा नं १२, १८, १९, २०, २१, २२, २३, २४, २५ व २७ य् स्रोतय् हे फोहर वर्गीकरण व्यवस्थापन न्ह्याकूगु खः। प्रमुख राईया कथं, स्रोतय् हे फोहर व्यवस्थापनलिपा थौंकन्हय् येँमपां न्हिंन्हिथं १५ ट्रक जक फोहर बञ्चरेडाँडाय् यंकाच्वंगु खः।

थ्वस्वयांन्ह्यः अथे वर्गीकरण मयाःबलय् न्हिंन्हिथं २० ट्रकतक फोहर छ्वयाच्वंगु खः। महानगरपालिका दुने न्हय्गू थासं न्हियान्हिथं वर्गीकरण याःगु फोहर व्यवस्थापन न्ह्यायेधुंकाः थ्यंमथ्यं ३.१९ मेट्रिक टन फोहर पाः जूगु वय्कलं धयादिल । प्रमुख राईं धयादिल, “सहर दुने फोहरया स्रोत वर्गीकरण यानाः ढुवानीइ सहज यायेत व अन्तिम व्यवस्थापनय् मात्रा पाः यायेत हे वर्गीकरण याःगु खः।”

छेंपिहाँवइगु फोहरलिसें उत्पादन जुइगु सुक्खा फोहर बिक्री यायेत नं महानगरपालिकां ७ गू थाय् वर्गीकरण यानाः वैज्ञानिक विधि नालेगु धाःगु खः। फोहरमैला सङ्कलन व ढुवानीसम्बन्धी कार्यविधि २०८१ कार्यान्वयनय् हयाः वर्गीकरणपाखें फोहरया मात्रा पाः यायेगु, हाकनं छ्यलेज्यूगु व विसर्जन यायेत क्षेत्रगत आधारय् व्यवस्थापन यायेगु ज्या न्ह्याकूगु खः।

सार्वजनिक निजी साझेदारी वा निजी ख्यःलिसे सेवा खरिद यानाः वा आय ठेक्काया प्रक्रियां समुदायय् जूगु फोहरमैला सङ्कलन व ढुवानी यायेग कार्यविधि जारी याःगु खः।

Categorized in राष्ट्रिय