स्वास्थ्य बीमा बोर्डं सेवा प्रदायक स्वास्थ्य संस्थातय्त न्ह्यानाच्वंगु आर्थिक दँया मङ्सिरतकया बक्यौता ध्यबा भुक्तानी याःगु दु। बोर्डं थौं छगू विज्ञप्ति पितब्वयाः सेवा प्रदायक स्वास्थ्य संस्थातय्त बक्यौताबापत बिइमाःगु २३ अर्ब ४४ क्वति २ लख ९८ द्वः व १५ ध्यबा भुक्तानी याःगु धाःगु ख।

बोर्डं स्वास्थ्य बीमा बोर्डय् आबद्ध फुक्क सेवा प्रदायक स्वास्थ्य संस्थातय्गु वंगु मङ्सिरतकया दाबी बक्यौता फरफारक जूग धाःगु खः। वंगु पुसंनिसेंया दाबी भुक्तानी यायेत आवश्यक बजेट व्यवस्थापन लिसें दिगो वित्तीय स्रोत सुनिश्चितताया निंतिं सम्बन्धित निकायलिसे मद्दिक समन्वय व कुतः जुयाच्वंगु बोर्डं धाःगु खः।

स्वास्थ्य बीमा बोर्डं फुक्क सेवा प्रदायक स्वास्थ्य संस्थातय्त बीमित सेवाग्राहीतय्गु उपचार सेवाय् छुं नं कथंया अवरोध वा कठिनाइ सिर्जना मजुइकूसे स्वास्थ्य बीमा ज्याझ्वः अन्तर्गत क्वःछिनातःगु मापदण्डकथं गुणस्तरीय स्वास्थ्य सेवा उपलब्ध याकेत नं निर्देशन ब्यूगु ख। बोर्डं फुक्क बीमित सेवाग्राहीतय्त स्वास्थ्य बीमा अन्तर्गत उपलब्ध सेवाया जिम्मेवारी कयाः सदुपयोग यायेत, अनावश्यक स्वास्थ्य सेवा वा परीक्षणया माग मयायेत इनाप याःगु खः।

अथेहे बोर्डं चिकित्सक लिसें स्वास्थ्यकःमितय्त आवश्यकतास्वयां अप्वः परीक्षण वा उपचारया निंतिं दबाब मबीत लिसें स्वास्थ्य बीमा ज्याझ्वःया दिगोपना व प्रभावकारिता कायम यायेत थःगु महत्त्वपूर्ण भूमिका म्हितेत नं आह्वान याःगु खः।

Categorized in राष्ट्रिय