संसदीय सुनुवाइ समितिं निर्वाचन आयोगया प्रमुख निर्वाचन आयुक्त व निर्वाचन आयुक्तया निंतिं सिफारिस याःपिं स्वम्हविरुद्ध उजुरी आह्वान याःगु दु। समितिं थौं सार्वजनिक सुचं पितब्वयाः संवैधानिक परिषद्पाखें सिफारिस याःपिं मनूतय्गु नियुक्ति पाय्छि मजू धइगु सुयाके नं ठोस आधार, दसि वा सुचं दःसा १० दिं दुने समितिइ उजुरी बिइत इनाप याःगु खः।

सुचं कथं प्रमुख निर्वाचन आयुक्तय् सिफारिस यानातःम्ह मानबहादुर कार्की (मोरङ) लिसें निर्वाचन आयुक्त तय्के सिफारिस यानातःपिं डा राजीव सुब्बा (येँ) व गुरुप्रसाद वाग्ले (ओखलढुङ्गा) विरुद्ध दसिलिसें नेपाली वा अङ्ग्रेजी भाषं उजुरी बिइफइ। उजुरीइ उजुरीकर्ताया नां, थर, ठेगाना, फोन नम्बर व ध्वाथुइक जिल्ला न्ह्यथनातःगु जुइमाः ।

उजुरी बिइबलय् आधार व दसिया कागजातया प्रतिलिपि नं संलग्न यायेमाःगु समितिं धाःगु खः।समितिया कथं सिंहदरबारया संसदीय सुनुवाइ समितिया सचिवालय बिइत वा जिल्ला प्रशासन ज्याकुथिपाखें दस्तुर मपूसे हे छ्वयेफइ। समितिं उगु सुचं न्हापांखुसी असार २६ गते पिकयागु धाःगु खः।प्रधानमन्त्री वालेन्द्र शाहया अध्यक्षताय् थ्व हे असार १९ गते च्वंगु संवैधानिक परिषद्या बैठकं वय्कःपिंत नियुक्तिया निंतिं सिफारिस यायेगु निर्णय याःगु खः।

Categorized in राष्ट्रिय