बागतमी प्रदेशया संस्कृति नापं पर्यटनमन्त्री सुरेश श्रेष्ठं पर्यटकीय लागा ठमेलं नेपाःयात अन्तरराष्ट्रियस्तरय् म्हसीकूगु धयादीगु दु।

ठमेल पर्यटन विकास परिषदं थौं थन ग्वसाः ग्वःगु ३० व ३१ क्वःगु वार्षिक साधारणसभा लिसें निर्वाचनया झ्वलय् वय्कलं नेपाःया पर्यटन ख्यःया विकासय् ठमेलया योगदान महत्वपूर्ण जू धयादिल। मन्त्री श्रेष्ठं बागमती प्रदेशं पर्यटन प्रवद्र्धन व पर्यटक पूर्वाधारया विकास यायेत आर्थिक दँ २०८३÷८४ या निंतिं ४ अर्ब बजेट विनियोजन याःगु धयादिल।

वय्कलं ठमेल लागाय् व्यापार व्यवसाय यानावयाच्वंपिं अप्वः धइथें व्यवसायी छेँबहाल नं पुलेमफइगु अवस्थाय् थ्यंगु न्ह्यथनादिसें अजाःपिं व्यवसायीतय्गु नं समस्याया निंतिं परिषदं ज्या यायेमाः धकाः धयादिल।

येँ महानगरपालिका–१६ या वडा अध्यक्ष रोजिना श्रेष्ठं सुरक्षित, व्यवस्थित व प्रविधियुक्त ठमेल निर्माण यायेत परिषदं ज्या यायेमाःगुलिइ बः बियादिल। नेपाःयात विश्वस्तरय् म्हसीकेत ठमेल लागां ग्वाहालि यानावयाच्वंगु वय्कःया धापू खः।नेपाल एसोसिएसन टुर्र एण्ड ट्राभल एजेन्ट्स (नाट्टा)या नायः कुमारमणि थपलियां नेपाः वइपिं फुक्क धइथें विदेशी पर्यटक ठमेल छकः वइगु कनादिसें लिपांगु इलय् ठमेल चिब्यानावनाच्वंगु धयादिल ।

हवाई ख्यलय् लगानी अप्वः मजूतले नेपाःया पर्यटक ख्यलं गति काये मफइगु वय्कःया धापू खः। परिषद्या नायः धु्रव अधिकारीं ठमेल लागाया विकास यायेत परिषदं व्यवसायी व छेँथुवाःलिसे सहकार्य यानाः ज्या यानाच्वंगु धयादिल । वय्कलं अन्तरराष्ट्रिय स्तरकथं दूगु ठमेलयात सङ्घीय सरकारं विशेष योजना दयेकाः विकास यायेमाःगु न्ह्यथनादिल।

परिषद्या पूर्वनायः डा रामशरण थपलिया, न्वकू सहदेव धमला (विमल), महासचिव बद्री तिमल्सिनालिसेंपिंसं ठमेल लागायात विशेष पर्यटकीय गन्तव्यकथं विकास यायेमाः धयादिल । विंस २०४८ सालय् पलिस्था जूगु ठमेल पर्यटन विकास परिषदय् थौंकन्हय् द्वःछि व ५०० स्वयां अप्वः छेँथुवाः लिसें व्यवसायी आबद्ध जुयाच्वंगु खः। 

Categorized in राष्ट्रिय