निर्वाचन आयोग नेपालया कार्यवाहक प्रमुख निर्वाचन आयुक्तया भाला आयुक्त डा जानकी कुमारी तुलाधरं कःघानादीगु दु। थ्वस्वयां न्ह्यःया कार्यवाहक प्रमुख निर्वाचन आयुक्त रामप्रसाद भण्डारी थ्व हे असार २३ गते ६५ दँया उमेर हदं यानाः अवकाश काःगुलिं अनंलिपाया वरियताय् लानादीम्ह आयुक्त डा तुलाधरयात उगु भाला वंगु खः।

आयुक्त भण्डारीया हे नेतृत्वय् वंगु फागुन २१ गते प्रतिनिधिसभा दुजःया निर्वाचन क्वचाःगु खः। न्याम्ह दुजः दइगु आयोगय् थौंकन्हय् आयुक्त डा तुलाधर व आयुक्त सगुनशमशेर जबरा कायम जुयाच्वनादी।

उगु इलय्या प्रमुख निर्वाचन आयुक्त दिनेशकुमार थपलियाया २०८२ वैशाख ५ गते व उबलय्या निर्वाचन आयुक्त ईश्वरीप्रसाद पौडेलया २०७९ फागुन ४ गते कार्यकाल क्वचाःगु खः ।

संसदीय सुनुवाइ समितिं प्रमुख निर्वाचन आयुक्त व निर्वाचन आयुक्तया निंतिं सिफारिस याःपिं स्वम्हविरुद्ध उजुरी आह्वानलिसें सुनुवाइ प्रक्रिया सुरु याःगु खः। 

Categorized in राष्ट्रिय