येँ महानगरपालिकाया १९ क्वःगु अधिवेशन लिसें नगरसभा क्वचाःगु दु। वंगु जेठ ३१ गते सुरु जूगु उगु अधिवेशन खुक्वःगु बैठकलिसें क्वचाःगु खः।

बैठकय् नगरसभाया प्यक्वःगु व न्याक्वःगु बैठकय् पेस जूगु संशोधन विधेयक व वार्षिक प्रतिवेदनय् सहलह जूगु ख। उगु झ्वलय् विधायन समितिया दुजः हुमादेवी आचार्यं दयाच्वंगु कानुनय् समसामयिक संशोधन सम्बन्धी विधेयकया प्रस्तावित व्यवस्था पेस यानादिल।

पेस याःगु विषयय् नगरसभा दुजःपिं विमलकुमार होडा, सन्तोष ढुङ्गेल, मचाराजा महर्जन, सुरेश मानन्धर व रोजिना श्रेष्ठं धारणा तयादिल। बैठकय् वःगु खँ, लिखित संशोधन प्रस्तावयात दुथ्याकाः सभाया नायः लिसें महानगरपालिकाया कार्यवाहक प्रमुख सुनिता डङ्गोलं सभाय् निर्णयार्थ पेस यानादिगु खः। उगु विधेयकलिसें सभाया न्याक्वःगु बैठकय् पेस जूगु न्यायिक समिति, लेखा समिति व सुशासन समितिया वार्षिक प्रतिवेदनय् सभाया दुजलं बियादीगु सुझाव दुथ्याकाः निर्णयया निंतिं पेस जूगु खः।पेस जूगु प्रस्ताव सर्वसम्मतं पारित जुइ धुंकाः सभानायः डङ्गोलं नगरसभाया बैठक क्वचाःगु घोषणा यानादिल।

वय्कलं स्वीकृत ज्याझ्वःया सफल कार्यान्वयनं मतदाता, महानगरवासी व राजधानी सहर आश्रितपिनिगु हित, उपयोग व सुरक्षाया प्रत्याभूति बिइकथं ज्या यायेत सम्बद्ध सकसित नं इनाप यानादिल। बैठकय् कार्यवाहक प्रमुख डङ्गोलं आर्थिक दँ २०८३÷८४ या निंतिं ११ गू क्षेत्रया १०१ गू बुँदाय् नीति प्रस्ताव यानादिल।

उगु प्रस्ताव थ्व हे असार १ गतेया अधिवेशनया निक्वःगु बैठकं सर्वसम्मतं पारित याःगु खः। अथेहे, असार ४ गतेया स्वक्वःगु बैठकय् कार्यवाहक प्रमुख डङ्गोलं आर्थिक दँ २०८३÷८४ या निंतिं येँ महानगरपालिकाया २५ अर्ब ८८ क्वति ३० लख ५५ द्वः बजेट प्रस्ताव पेस यानादिल। उगु हे बैठकय् वय्कलं आर्थिक दँ २०८३÷८४ या निंतिं आर्थिक विधेयक लिसें विनियोजन विधेयक पेस यानादिल।

Categorized in राष्ट्रिय