म्हिगः २०८३÷०३÷२५ गते राहदानी विभाग न्ह्यने मुगु जिल्लाय् च्वम्ह थौकन्ह्य ख्वपय् च्वनाच्वम्ह गणेश नेपालीं आत्मदाहया कुतः यागु व थौ उपचारया झ्वलय् तसकं दुःखं मदुगुलि येँ महानगरपालिका स्तब्ध जगु दु।

थुगु घटनायात कया येँ महानगरपालिका तसकं दुःख प्वकूगु दु। थुगु घटना याःगु निष्पक्ष छानविन यायेत नेपाल सरकार, गृह मन्त्रालयं छानविन समिति गठन यायेगु निर्णय जुगु धका जानकारी सञ्चारमाध्यम पाखे वःगु दु। उगु समितिं तथ्यगत छानविनय् येँ महानगरपालिकां माःगु ग्वहालि यायेगु जुइ। छानविनपाखे वःगु सुझावया आधारय् मागु सुधारात्मक व जिम्मेवारीपूर्ण पलाः न्ह्याकेगु जुइ।

महानगरपालिका नेपाल सरकार नाप समन्वय व सहकार्य याना समाधानया निति वइगु उपाय म्हसिका, थज्यागु घटना हाकन मजुकेगु निति व बालाक्क कुतः याना कार्यान्वयनय् यकेत तयार दु। थज्यागु संवेदनशील इलय् संयमित जुइत व धैर्य धारण यायेत जिमिसं सकसित इनाप यानाच्वना।

मदुम्ह गणेश नेपालीया परिवारयात येँ महानगरपालिकापाखे मानवीय ग्वहालि, रोजगारी उपलब्ध यायेगु व मस्तयेत निःशुल्क शिक्षा बिइगु सम्वन्धय् विधिसम्मत कथं कार्यपालिका बैठकपाखे निर्णय यायेगु  धका प्रवक्ता नविन मानन्धरं छगु बिज्ञप्ती पिकया धाःगु दु।

Categorized in राष्ट्रिय